BYD Uzbekistan Factory va FVV Akademiyasi elektromobillar xavfsizligi yo‘nalishida hamkorlikni yo‘lga qo‘ymoqda

BYD Uzbekistan Factory va FVV Akademiyasi elektromobillar xavfsizligi yo‘nalishida hamkorlikni yo‘lga qo‘ymoqda

Toshkent shahrida O‘zbekiston Respublikasi Favqulodda vaziyatlar vazirligi Akademiyasi tomonidan “Elektromobillar: ishlab chiqarish, ekspluatatsiya, xavfsizlik va ularning utilizatsiyasiga kompleks yondashuv” mavzusida respublika ilmiy-amaliy konferensiyasi o‘tkazildi.

Tadbirda Favqulodda vaziyatlar vazirligi, Transport vazirligi, “BYD Uzbekistan Factory” MChJ QK, shuningdek, respublikaning yetakchi oliy ta’lim va ilmiy-tadqiqot muassasalari masʼullari, Akademiya rahbariyati, professor-oʻqituvchilari, kursantlar va OAV vakillari ishtirok etdi.

Konferensiya davomida elektromobillarni ishlab chiqarish va mahalliylashtirish, ulardan foydalanish va texnik xizmat ko‘rsatish, yong‘in xavfsizligini ta’minlash, elektromobillar bilan bog‘liq yo‘l-transport hodisalarida qutqaruv ishlarini tashkil etish, shuningdek, akkumulyator batareyalarining xavfsizligi, utilizatsiyasi va qayta ishlanishi masalalari muhokama qilindi.

Tadbir doirasida FVV Akademiyasi boshligʻi yuridik fanlari doktori professor polkovnik Muzaffarjon Mamasiddiqov hamda “BYD Uzbekistan Factory” MChJ QK bosh direktori Azizbek Muhitdinov so‘zga chiqdi.

Konferensiyaning muhim natijalaridan biri — “BYD Uzbekistan Factory” MChJ QK va Favqulodda vaziyatlar vazirligi Akademiyasi o‘rtasida hamkorlik memorandumining imzolanishi bo‘ldi.

Mazkur memorandum elektromobillar va ularning xavfsiz ekspluatatsiyasi bo‘yicha ilmiy-amaliy, o‘quv hamda ilmiy-texnik hamkorlikni rivojlantirishni nazarda tutadi. Hamkorlik doirasida mutaxassislar tayyorlash va tajriba almashish, seminar va treninglar tashkil etish, elektromobillarning yong‘in xavfsizligi va akkumulyator texnologiyalarini o‘rganish, shuningdek, qo‘shma amaliy mashg‘ulotlarni o‘tkazish rejalashtirilgan.

Mazkur hamkorlik elektromobillardan xavfsiz foydalanish bo‘yicha bilim va amaliy ko‘nikmalarni rivojlantirish, soha mutaxassislarini tayyorlash hamda tegishli tashkilotlar o‘rtasidagi ilmiy-amaliy aloqalarni yanada mustahkamlashga xizmat qiladi.