“O‘zavtosanoat” AJ tarkibiy tarmoq korxonasi «UZ-KORAM KO» korxonasi KIA Sonet modeli uchun plastik butlovchi qismlar ishlab chiqarishni yo‘lga qo‘ydi.“UZ-KORAM KO” MChJ hamda “ADM Jizzakh” o‘rtasidagi kelishuvga asosan Kia Sonet modeli uchun “energy absorber” butlovchi qismi, shuningdek, “ADMC DASAN” qo‘shma korxonasiga oldi va orqa bamperlar, interier plastik qoplamalari ishlab chiqarish bo‘yicha shartnoma imzolandi. Ishlab chiqarilgan qismlar bo‘yoqlash uchun “ADM Jizzakh” korxonasiga yetkazib beriladi.
Ayni vaqtda “UZ-KORAM KO” korxonasi tomonidan KIA Sonet modeli uchun 5 turdagi plastik butlovchi qismlar dastlabki na’munalari ishlab chiqarilayotgan bo‘lsa, kelishuvga asosan mahsulotlar turi 18 taga yetkaziladi.
Avtomobil ishlab chiqaruvchilar bilan samarali hamkorlikning yo‘lga qo‘yilishi albatta, import butlovchi qismlarga bo‘lgan ehtiyojni kamaytiradi va mamlakat iqtisodiyotnining yanada rivojlanishiga xizmat qilib, milliy mahsulotlar ishlab chiqarishda mahalliylashtirish darajasini oshirishga yordam beradi. Ishlab chiqarishda mahalliy xom ashyolardan foydalanish bu avtomobilsozlik sanoatida muhim sanalgan yetkazib berish muddatlarini qisqartirish va ishlab chiqarish samaradorligini oshirish imkonini yaratadi. Bundan tashqari, qo‘shma loyihalar hamda tajriba almashish mexanizmining ishlab chiqilishi- mahalliy korxonalarning xalqaro bozordagi raqobatbardoshligini oshirishga turtki beruvchi ilg‘or texnologiyalarni joriy etish va ishlab chiqarish jarayonlarini takomillashtirishga xizmat qiladi.
Ma’lumot o‘rnida, “UZ-KORAM KO” MChJ “O‘zavtosanoat” AJ tarkibiy tarmoq korxonasi hisoblanadi. “UzAuto Motors” zavodida ishlab chiqarilayotgan avtomobillarning asosiy tashqi plastik butlovchi qismlari xususan, bamperlar, tashqi moldinglar, g‘ildirak usti qoplamalari, eshik tutqichlari, orqani ko‘rsatuvchi yon oynalar, hamda boshqa bir necha turdagi butlovchi qismlar mazkur korxona tomonidan yetkazib beriladi.