Toshkentda Italiyaning Sila Holding Industriale SpA korxonasi bilan avtomobil komponentlarini ishlab chiqarishni yo‘lga qo‘yish bo‘yicha qo‘shma loyiha muhokama qilindi
Toshkentda Italiyaning Sila Holding Industriale Sp...
"O‘zavtosanoat" AJ huzuridagi Mahalliylashtirishga ko‘maklashish markazida Sila Holding Industriale SpA delegatsiyasi bilan uchrashuv bo‘lib o‘tdi. Mazkur korxona dunyodagi yetakchi uzatma qutilari selektorlari va avtomobillar egiluvchan tros mahsulotlarini ishlab chiqaruvchilardan biri hisoblanadi.
Delegatsiya tashrifi joriy yilning may oyida "O‘zavtosanoat" AJ tomonidan Turin shahrida tashkil etilgan biznes-forum doirasida erishilgan kelishuvlarning davomi sifatida amalga oshirildi. Italiyalik vakillar O‘zbekistonni yuqori texnologiyali ishlab chiqarishni joylashtirish va mahalliy korxonalar bilan hamkorlikni kengaytirish uchun istiqbolli maydon sifatida ko‘rib chiqmoqda.
Muzokaralar chog‘ida tomonlar uzatma qutilari selektorlarini ishlab chiqarish imkoniyatlari, jumladan, o‘zbek komponent ishlab chiqaruvchilarni jalb etgan holda yo‘lga qo‘yish masalalarini muhokama qildi. Loyihani amalga oshirish yangi ish o‘rinlari yaratish, mamlakat korxonalarining texnologik salohiyatini oshirish hamda mintaqaviy sanoat rivojiga hissa qo‘shishga xizmat qiladi.
Muloqot davomida "O‘zavtosanoat" AJ va Sila Holding Industriale SpA vakillari ushbu loyihani belgilangan muddatlarda amalga oshirish va uning ijrosini ta’minlash bo‘yicha ishlarni davom ettirishga tayyor ekanliklarini bildirdi.
Ma’lumot uchun, Sila Holding Industriale SpA 1943 yilda tashkil etilgan bo‘lib, Italiya, Polsha, Hindiston, Xitoy va Braziliyada zamonaviy ishlab chiqarish maydonlariga ega va o‘z mahsulotlarini dunyoning yetakchi avtomobil ishlab chiqaruvchi zavodlariga yetkazib beradi.
