Joriy yilning 26-iyul kuni Jizzax viloyati bilan tanishish maqsadida tashrif buyurgan turli mamlakatlarning yuqori martabali diplomatlari “BYD Uzbekistan factory” zavodida bo‘lishdi. Delegatsiya a’zolari tarkibi Xitoy, Rossiya, Mo‘g‘uliston, Qozog‘iston va Qirg‘izistonning favqulodda va muxtor elchilari, shuningdek, Belarus va Tojikiston diplomatik vakolatxonalari vakillaridan iborat.
Xitoy Xalq Respublikasining Favqulodda va Muxtor Elchisi Yuy Tszyan qolaversa, Oleg Maltinov (Rossiya Federatsiyasi), Batbaatar Laddaanhuu (Mo‘g‘uliston), Beybut Atamkulov (Qozog‘iston), Musa Djambaev (Qirg‘iziston) kabi qator elchilar, shuningdek, Belarus Respublikasi muvaqqat ishlar vakili Aleksandr Opimak “BYD Uzbekistan factory” zavodining texnologik jarayonlari va ishlab chiqarish quvvatlari bilan tanishdilar. Diplomatlar yangi energiya manbalarida harakatlanuvchi avtomobillar ishlab chiqarishda yuqori darajadagi avtomatlashtirish va ilg‘or texnologiyalar joriy etilganini ta’kidlab o‘tdilar. Asosiy e’tibor korxona faoliyatidagi ustuvor yo‘nalishlar sanalgan ekologik xavfsizlik va barqaror rivojlanish masalalariga qaratildi.
Tashrif chog‘ida Xitoy Xalq Respublikasi elchisi Yuy Tszyan mazkur loyiha yashil texnologiyalarni rivojlantirish va mamlakatlar o‘rtasidagi savdo aloqalarini yana mustahkamlashda qanchalik muhim ekanligiga alohida to‘xtalib o‘tdi. Rossiya Federatsiyasining Favqulodda va Muxtor Elchisi Oleg Sergeevich Maltinov ilg‘or texnologiyalar sohasida hamkorlikni kengaytirishdan manfaatdor ekanligini bildirdi. Boshqa davlatlar vakillari ham o‘z mamlakatlari iqtisodiyotida yangi texnologiyalarning uyg‘unlashuvi yuqori ahamiyatga ega ekanini aytib o‘tdilar.
“BYD Uzbekistan factory” korxonasiga tashkil etilgan tashrif safar dasturining muhim qismiga aylandi hamda innovatsiyalar va texnologiyalar sohasidagi xalqaro munosabat va hamkorlikni yanada chuqurlashuviga xizmat qildi.
