«Ўзавтосаноат» АЖ ва Қиргиз Республикаси Энергетика ва саноат вазирлиги Ҳамкорлик тўғрисидаги меморандумни имзоладилар. Меморандум доирасида томонлар Қирғизистонда енгил автомобиллар ва тижорат техникаларини ишлаб чиқаришни ташкил этишда ҳамкорлик қилиш тўғрисида келишиб олдилар.

Меморандум Тошкент шаҳрида бўлиб ўтган «ИННОПРОМ» халқаро саноат кўргазмаси доирасида имзоланди ва маросимда «Ўзавтосаноат» АЖ бошқарув раиси Шавкат Умурзаков ва Қирғиз Республикаси Энергетика ва саноат вазири Кубанычбек Турдубаев иштирок этдилар.

Қирғизистон томони Ўзбекистон автомобиль саноатини юксак баҳолади ва томонлар Қирғиз Республикасида транспорт воситалари ишлаб чиқаришни ташкил этиш имкониятларини ўрганишдан манфаатдор эканликларини билдирдилар. Шу мақсадда ҳамкорликнинг техник, молиявий ва бошқа жиҳатларини ўрганиш учун қўшма ишчи гуруҳини тузиш режалаштирилмоқда.

Ушбу йўналишни амалга ошириш Қирғизистон томонга янги ишчи ўринларини яратиш, ЯИМда саноат улушини ошириш, экспорт бозорига чиқиш ва аҳолини халқаро сифатдаги автомобиллар билан таъминлашга имконини беради.

Томонлар давлатлараро савдо алоқаларини, шу жумладан, автомобилсозлик саноатини ривожлантириш ва кенгайтиришда умумий манфаатлар ва мақсадларга эга. Бугунги кунда «Ўзавтосаноат» АЖ Қирғизистонга автомобиль ва тижорат техникаларини экспорт қилмоқда ҳамда бу икки томонлама ҳамкорликни мустаҳкамлашга қизиқиш ва қўшма лойиҳаларни амалга оширишда ҳамкорлик қилишга туртки бўлди.

«Ўзавтосаноат» АЖ Қиргизистонлик ҳамкорларни юқори баҳолайди ва уларга билдирилган ишонч учун самимий миннатдаорчилик билдиради. 

 Telegram / Facebook / Instagram

www.uzavtosanoat.uz