Давлат раҳбари “Cooperation LAB” тармоқлараро кооперациясини ривожлантириш марказининг очилишида иштирок этди

So'rang javob beramiz

Тошкент шаҳар Бектемир туманида Президент Шавкат Мирзиёев иштирокида “Cooperation LAB” тармоқлараро кооперациясини ривожлантириш марказининг очилиши ўтказилди.

Кооперацион марказ “Ўзавтосаноат” ташаббуси билан турли тармоқларда қўлланиладиган деталлар ишлаб чиқаришни маҳаллийлаштириш масалаларини ҳал қилиш учун ташкил этилди. Платформа ишлаб чиқариш кооперацияси ва маҳаллийлаштирилишига қаратилган бўлиб, мамлакатимиз тадбиркорларининг ҳамкорлигини кенгайтиришни ўз мақсади деб билади.

Бозор конъюнктурасидан ва саноат корхоналари талабларидан келиб чиқилса, тармоқлар ўртасида уларнинг ҳар бири ривожланишига хизмат қилувчи алоқалар мустаҳкамланишининг мақсадга мувофиқлиги яққол намоён бўлади. Бугунги кунда "UzAuto Motors", "SamAuto", "Uz Truck & Bus Motors", "UzAutoTRAILER", "UzAuto Motors Powertrain", "Тошкент трактор заводи" каби корхоналар замонавий автотранспорт воситалари ва уларга бутловчи қисмлар ишлаб чиқармоқдалар. Бироқ кўплаб эҳтиёт қисмлар четдан келтирилади, бу қўшимча харажатлар деганидир. “Cooperation LAB”нинг асосий мақсади – автомобиль саноатида тармоқлараро кооперацияни ривожлантириш, импортни қисқартириш ва “ғоядан растагача” тамойили асосида маҳаллийлаштириш даражасини оширишдир.

Марказнинг доимий фаолият юритувчи кўргазмалар павильонида “Ўзавтосаноат” ва бошқа компаниялар мамлакат автомобиль бозори учун импорт қилувчи бутловчи қисмлар, хом ашё ва бошқа материаллар намуналари танишиш учун қўйилади. Бундан ташқари, майдончада “Ўзэлтехсаноат” ассоциацияси корхоналари ҳам кенг тақдим этилган, бу эса ўзлаштириш ва маҳаллийлаштириш учун маҳсулотлар рўйхатини анчайин кенгайтиради. Бу ерда маҳаллий корхоналардаги ишлаб чиқариш йўналишлари ҳажмлари ва потенциал йўналишлари билан танишиш ҳамда Ўзбекистон ҳудудида маҳаллийлаштириш учун намуналар олиш мумкин бўлади. Маҳаллий хом ашёдан ва ишлаб чиқариш ресурсларидан кенг фойдаланиш рақобатбардош маҳсулот ишлаб чиқаришга ва бутловчи қисмлар импортининг қисқаришига хизмат қилади.

“Cooperation LAB” машинасозлик ва электр техникаси тармоқларида кооперация кенгайишида салмоқли салоҳиятга эга. Марказ тадбиркорларни инжиниринг, техник ечимлар билан ва бозорлар излашда ёрдам беради.

Президент Шавкат Мирзиёев марказ икониятлари билан танишди, малакали конструкторлар ва олимларни жалб қилиш, янги техникани ўзлаштириш ва буюртма асосида етказишни ўзлаштириш муҳимлигини қайд этди. Шунингдек, тақдимотда вилоятлар ҳокимларига марказ билан биргаликда жойларда саноат кооперацион марказлар яратиш бўйича янги лойиҳа таклифларини ишлаб чиқиш топширилди. Бундан ташқари, марказда ишлаб чиқилган таклифларни “лойиҳалар фабрикаси” орқали молиялаштириш учун тижорат банклари билан ҳамкорлик ўрнатиш зарурлиги ҳам қайд этилди.

“Cooperation LAB” тармоқлараро кооперацияни ривожлантириш маркази барча маҳаллий тадбиркорларни ва барча тармоқлардаги бутловчи қисмлар ишлаб чиқарувчиларни ишлаб чиқаришни маҳаллийлаштиришда ҳамкорликка таклиф этади.

Манфаатдор корхоналар ва ташкилотларнинг келгуси ҳамкорлиги ва кооперацияси “Cooperation LAB” кооперацион майдонча фаолияти доирасида амалга оширилади. Кооперацион майдонча фаолиятига оид барча саволлар билан қуйидаги контактларга мурожаат қилинг:

cooperation@uzavtosanoat.uz

+998 98 362 68 00