Sirdaryo viloyatida “ISUZU” rusumli avtobusning gaz baloni portlaganligi yuzasidan rasmiy munosabat

Ma'lum bo‘lishicha, joriy yilning 18 avgust kuni Sirdaryo viloyatida avtomobillarga gaz quyish shahobchasida “ISUZU” rusumli avtobusning gaz balonlaridan biri portlagan. 

Ushbu holatga oydinlik kiritish maqsadida, “O‘zavtosanoat” AJ tizimidagi Komplaens xizmati xodimlari hamda “Samarqand avtomobil zavodi” MChJ QK mas'ul xodimlari zudlik bilan joyiga borib o‘rganishganida, 18 avgust kuni 14:30larda Sirdaryo viloyati Oq Oltin tumanida joylashgan, “NUR TRANS GAS” MChJ gaz to‘ldirish shahobchasi hududida davlat raqami 90 946 WAA bo‘lgan “ISUZU SAZ NP21” rusumli avtobusning ust qismiga o‘rnatilgan gaz ballonlaridan biri portlaganligi ma'lum bo‘ldi. 

Mazkur avtobus dizel' yoqilg‘isida xarakatlanishga moslashgan holda 2012 yilda “Samarqand avtomobil zavodi” MChJ QKda ishlab chiqarilib, MChJning Xorazm viloyatidagi rasmiy dilleri orqali sotilgan.

Keyinchalik, avtobusni sotib olgan korxona tomonidan 2014 yilda 60 litr sig‘imli, 6 dona gaz balonlar avtobus konstruksiyasiga o‘zgartirish kiritilgan holda, avtobusning ust qismiga o‘rnatilgan.

Bundan tashqari, ushbu avtobus bir yillik kafolat davrida kafolat talablari bo‘yicha belgilangan davriy ko‘rikdan o‘tkazish masalasida rasmiy dilerga murojaat qilmagan.  

Ta'kidlash kerakki, kafolatli xizmat ko‘rsatish sohasi siyosatiga ko‘ra, avtobus konstruksiyasiga o‘zgartirish kiritilgan hollarda, berilgan kafolat doirasidan o‘z-o‘zidan chiqib ketadi. 

Yuqoridagi holat huquqni muhofaza qiluvchi organlar tomonidan o‘rganilmoqda.

www.uzavtosanoat.uz

• event 23/08/2022
• local_offer Bo'lim: Yangiliklar