“UzAuto” vakillari Germaniyaning avtomobil kompaniyalari bilan hamkorlikni kengaytirish yuzasidan qator muzokaralar va uchrashuvlar o’tkazish uchun Germaniya Federativ Respublikasiga tashrif buyurishdi.

Muzokaralar davomida O‘zbekistonda “Škoda” hamda “Volkswagen” avtomobillarining ishlab chiqarilishini tashkil etish bilan modellar qatorini kengaytirish masalalari muhokama etildi. Shuningdek, O‘zbekiston-Germaniya ishlab chiqarish mahsulotlari qatorini kengaytirish bilan hududda yangi ish o’rinlarini yaratishga imkon beradigan yangi loyihalarni amalga oshirishda nemis hamkorlar tomonidan to‘g‘ridan-to‘g‘ri xorijiy investitsiyalarini jalb etish masalalari muhokama qilindi.

Shuningdek, Germaniyaga amaliy tashrif doirasida “UzAuto” vakillari avtomobil komplektatsiyalarini ishlab chiqaruvchi eng yirik korxona Schaeffler Group rahbariyati bilan muzokaralar olib borishdi.

Muzokaralar davomida Asakadagi zavodda joriy etilayotgan GM platformasida ishlab chiqarilayotgan avtomobillar uchun zarur butlovchi qismlarni yetkazib berish, hamda mahalliylashtirish sohasidagi hamkorlikni kengaytirish imkoniyatlari atroflicha o’rganildi.

Schaeffler Group rahbariyati O‘zbekiston bozori ular uchun avtomobilsozlik, tog‘-kon, metallurgiya va qurilish sanoati uchun butlovchi qismlar yetkazib berish, shuningdek, butlovchi qismlarni mahalliylashtirish bo‘yicha hamkorlikni kengaytirishga oid rejalarni amalga oshirishda imkon bera olishini ta’kidlashdi.

Ma’lumot uchun: Schaeffler guruhi turli sanoat sohalari (avtomobilsozlik, aerokosmik)da foydalanish uchun yuqori sifatli mahsulotlar (shkivlar, podshipniklar, dvigatel klapanlari)ni INA, LuK va FAG brendlari ostida ishlab chiqaradi. Kompaniya tarkibida dunyoning 50 ta xorijiy davlatlarida joylashgan 180 dan ortiq korxonalar mavjud. Kompaniyaning yillik aylanmasi 10,7 milliard yevroni tashkil qiladi. Uning asosiy mijozlari Renault, Nissan, Ford, GM, Fiat, Toyota, Mazda, BMW va Peugeot kabi yirik avtomobil ishlab chiqaruvchilari hisoblanadi.

Bundan tashqari, Germaniyaga tashrif doirasida “UzAuto” delegatsiyasi qishloq xo‘jaligi mashinasozligi bo‘yicha dunyoning yetakchi kompaniyasi CLAAS GROUP vakillari bilan ham muzokaralar o'tkazdi. Uchrashuvda CLAAS GROUP direktorlar kengashi va aksiyadorlar qo‘mitasi raisi Katrina Klaas-Muhlhauser xonim ishtirok etdi. Muloqot chog’ida “Uz CLAAS Agro” MChJ XK negizida O‘zbekistonda qishloq xo‘jaligi mashinasozligi sohasida oʻzaro hamkorlik aloqalarini rivojlantirish, kelgusida  ishlab chiqarish va xizmat ko‘rsatish sohasida tajriba almashishning yo‘llari belgilab olindi.

Har ikki tomon O‘zbekiston bilan 1997-yilda boshlangan samarali hamkorlikni davom ettirish niyatlarini qat’iy bildirishdi.

Eslatib o‘tamiz, “Uz CLAAS Agro” MChJ XK qo‘shma korxonasi Germaniya-O‘zbekiston ilk lohiyalaridan biridir, CLAAS kompaniyasi esa, O‘zbekistonda ishlab chiqarishni yo‘lga qo‘ygan ilk nemis investorlaridan biri hisoblanadi.

• event 24/06/2022
• local_offer Bo'lim: Yangiliklar