Kuni kecha 1-iyun – Xalqaro bolalarni himoya qilish kuniga bag’ishlab UzAuto Motors Asaka avtomobil zavodida xodimlarning farzandlari uchun bayram tadbiri o’tkazildi. Bayram tadbirida ishchi xodimlarning farzandlari o‘rtasida o’tkazilgan tanlovda ishtirok etgan 90 nafarga yaqin bolalar ishtirok etishdi.
Tadbir davomida bolajonlar ota-onasi faoliyat ko’rsatib kelayotgan korxona bilan yaqindan tanishish, ish joyini ko’rish uchun zavod bo’ylab sayohat tashkil etildi. Dastlab zavod muzeyi bo’ylab boshlangan sayohat korxonaning yig’uv uchastkasida davom etdi. Sayohat yakunida “UzAuto Motors” AJ bosh direktori Bo Andersson so’zga chiqib, xodimlar orqali ularning farzandlarini ushbu sana bayrami munosabati bilan tabrikladi. Shuningdek, ijodiy tanlovda nafaqat g’oliblikni qo’lga kiritgan balki unda ishtirok etgan barcha bolajonlarga esdalik sovg’alari topshirildi.
–Biz, maktab bitiruvchilari, oliy ta’lim muassasalari talabalari bilan ko‘p tadbirlar uyushtirganmiz. Bu safar bolajonlar bilan dillashib, ularga quvonch ulashdik. Bunday tadbirlarimiz bardavomdir, – dеydi “UzAuto Motors” AJ bosh direktori Bo Andersson.
Bayramona tadbir so'nggida bolajonlarga bayram dasturxoni yozildi, bayram oshi va shirinliklar bolalar quvonchiga quvonch qo‘shdi, tadbirga yanada ko‘tarinkilik bag‘ishladi. Tanlovda qatnashganlarga tufha qilingan sovrinlar esa ularning ilk qo‘lga kiritgan yutuqlari sifatida umirbod xotiralarida muhrlandi.
Bayramona tadbir korxonaning Mehnat muhofazasi bo’limi, ichki kommunikatsiya, Ma’muriyat xizmati direksiyasi hamkorligida tashkil etildi.
