Bir xodim tarixi ruknimizda sizlarni o’z xodimlarimiz bilan tanishtirishda davom etamiz. Kadrda bugungi qahramonimiz – Vohidov Azimjon.

Vohidov Azimjon UzAuto Motors Asaka avtozavodida payvandchi bo‘lib ishlaydi. U o’z mehnat faoliyatini 1995 yilda boshlagan va hozirgi kunga qadar turli lavozimlarda ishlab kelmoqda. 28 yillik ish tajribasi bilan o’z ishining yetuk mutaxassisiga aylanib, bir nechta shogirdlarni tayyorlab ulgurdi. Bir nechta loyihalarda xususan, Cobalt, Nexia avtomobil liniyalarining demontaj jarayonlarida faol qatnashgan.

Mutaxassisimizning so‘zlariga ko‘ra, u bolalikdan texnika va asbob-uskunalarga qiziqqan va keyinchalik bu qiziqish uni shu payvandchilik kasbiga yetaklagan. Qolaversa, uning farzandi ham ota kasbiga havas qilib uning davomchisi bo’lib, kompaniyada ish faoliyatini boshlagan.

«Payvandchilik qiyin ish. Eng avvalo jismoniy chidamlik,  sabr-toqat, tezkorlikni talab etadi. Bu kasbda mehnat qiladigan mutaxassis asbob-uskunalarni, elektrotexnikani yaxshi bilishi, xavfsizlik qoidalariga rioya qilishi, ishlatiladigan agregatlar va uskunalarning ishlash usullari va tamoyillarini yaxshi tushunishi, fizika, kimyo sohasidagi bilimlarni mukammal egallagan bo’lishi kerak”, – deydi Vohidov Azimjon.

Xatosiz o’z majburiyatlarini mukammal bajarish kompaniya uchun muhimdir, chunki, barcha jarayonlar bir-biri bilan o‘zaro uzviy bog’liqdir deya alohida ta’kidlaydi.

Vohidov Azimjon payvandchining  samarali faoliyati uchun zarur bo‘lgan eng muhim sifatlar deb qobiliyat, mas'uliyat, intizom va ehtiyotkorlik kabi fazilatlarni hisoblaydi.

U o’z faoliyati davomida soha rivojiga katta hissa qo’shib, halol mehnati, ijtimoiy faolligi, mehnatsevarligi va vatanparvarligi bilan butun UzAuto Motors jamoasi hurmatiga sazovor bo’lib kelmoqda. Xususan, bir necha kun avval kompaniya kuniga bag’ishlab o’tkazilgan “Kompaniyam – faxrim” bayramona tadbir doirasida bo’lib o’tgan “Oshga marhamat” bellashuvida sovrinli o’rin egallab, o’zining fidokorona mehnatlari, ibratli ustoz shuningdek mahallako’y orasida namunali fuqaro, samimiy do’st, bag’rikeng inson, fidoiy hamkasb ekanligini yana bir marotaba namoyon etdi.

Qahramonimiz bo’sh vaqtini oila davrasida va yaqin do’stlari bilan o’tkazishni yoqtiradi. Qolaversa, mahallada tashkillashtiriladigan barcha tadbir va obodonlashtirish ishlarida ham faol qatnashadi. U o’z ishida hammasidan ko’proq ahil va inoq jamoa va “UzAuto Motors”dagi faoliyati davomida orttirgan tajribasini qadrlaydi.

Bugungi kunda payvandchilar sulolasini tashkil etgan ushbu oila vakillarining barchasini dasturxoni but, oilasi tinch va farovon. Dunyoda inson uchun bundan-da ortiq baxt bo’lmasa kerak deya e’tirof etadi.