"Korrupsiyasiz jamiyat – barqaror kelajak! shiori ostida tadbir o‘tkazildi

Joriy yilning 6-dekabr kuni “O‘zavtosanoat” AJda 9-dekabr – Xalqaro korrupsiyaga qarshi kurashish kuni munosabati bilan “Ochiq eshiklar kuni” tadbiri bo‘lib o‘tdi. 

Unda O‘zbekiston Respublikasi Korrupsiyaga qarshi kurashish agentligi, Huquqni muhofaza qilish akademiyasi vakillari va tinglovchilari, shuningdek, Toshkent davlat yuridik universiteti, Turin politexnika universiteti va Toshkent shahridagi Amity universiteti talabalari ishtirok etdilar.

“O‘zavtosanoat” AJ boshqaruv raisi o‘rinbosari F. To‘rayev korrupsiyaning oldini olish har bir fuqaro va tashkilotning burchi hisoblanishini ta’kidladi.

Tadbirda ishtirok etgan Korrupsiyaga qarshi kurashish agentligi vakili “O‘zavtosanoat” AJning komplayens tizimi natijalari hamda jamiyatning nafaqat Agentlik reytinglarida balki nufuzli Iqtisodiy hamkorlik va taraqqiyot tashkiloti tomonidan o'tkazilgan monitoring natijalari bo'yicha ham ijobiy baholanganini alohida e'tirof etib o'tdi.

Huquqni muhofaza qilish akademiyasi vakili esa Korrupsiyaga qarshi kurashish jarayonida muhim o'rin egallagan "Manfaatlar to'qnashuvi" to'g'risidagi O'zbekiston Respublikasi qonunining asosiy jabhalari va tadbiq etish mexanizmlari haqida so'z yuritdi.

Bundan tashqari, Komplayens xizmati rahbari A.Odilov “O‘zavtosanoat” AJ tizimida joriy yilning o‘tgan davri davomida korrupsiyaga qarshi kurashish, keng qamrovli xavflarni monitoring qilish va aniqlash bo‘yicha Komplayens, ishlab chiqarish va moliyaviy xavflarni monitoring qilish departamenti tomonidan olib borilgan qator tizimli va samarali ishlar xususida to'xtalib o'tdi. 

Unga ko‘ra, so‘nggi 9 oyda komplayens tizimi tomonidan erishilgan samaradorlik hajmi 2,3 trln. so‘mni tashkil qilgan bo‘lib, bu natija tizim ahamiyatini yana bir bor isbotladi.  

Shuningdek, jamiyatda samarali komplayens tizimi faoliyati va uning samaradorligini ta’minlab borishdagi ijobiy natijalarda komplayens jamoasi o‘rni yuqori ekani ta’kidlandi.

Tadbir ochiq va samimiy ruhda o‘tdi. Muloqot yakunida barcha ishtirokchilar o‘zlarini qiziqtirgan ko‘plab savollarga javob oldilar.

Ma’lumot o‘rnida, 2023-yilda Davlat idoralarining korrupsiyaga qarshi kurashishdagi faoliyati samaradorligi reytingida "O‘zavtosanoat" aksiyadorlik jamiyati 82 ball bilan “yaxshi” natijani qayd etgan.

• event 06/12/2024
• local_offer Bo'lim: Yangiliklar
• thumb_up Yoqdi (1)
• thumb_down Yoqmadi (3)