O‘zbekiston Respublikasi Prezidenti topshirig‘i ijrosini ta’minlash maqsadida “O‘zavtosanoat” AJ tomonidan talabalar bilan uchrashuvlar tizimli ravishda o‘tkazib kelinmoqda. Har hafta payshanba kuni tashkil etiladigan navbatdagi uchrashuv Turin politexnika universitetida boshqaruv raisining birinchi o‘rinbosari Sardor Umarov ishtirokida o‘tkazildi.
Tadbir davomida talabalarning ishlab chiqarish jarayonlariga amaliy integratsiyasiga alohida e’tibor qaratildi. Ularning avtomobilsozlik sohasidagi real loyihalarda, jumladan, texnik-iqtisodiy asoslarni ishlab chiqishda, o‘qish jarayonida ishlab chiqarish bilan yaqindan tanishishda hamda yangi loyihalarni ishga tushirishda ishtirok etish imkoniyatlari mavjudligi qayd etildi.
Zamonaviy texnologik yondashuvlarning, jumladan Industry 4.0 tamoyillarini joriy etish, raqamlashtirish jarayonlarini rivojlantirish va avtomobil sanoatida sun’iy intellekt asosidagi yechimlarni qo‘llashning ahamiyati ta’kidlandi.
Ochiq muloqot davomida yosh mutaxassislarning kasbiy rivojlanishi va ularni avtomobil sanoatini rivojlantirishning muhim jarayonlariga jalb etish masalalari yuzasidan tushuntirishlar berildi.
- 04/04/2026
- Bo'lim: “O‘zavtosanoat” AJda yoshlar siyosati