Joriy yilning 16–18-iyun kunlari poytaxtimizda o‘tkazilayotgan V Toshkent xalqaro investitsiya forumida “O‘zavtosanoat” AJ avtomobilsozlik sanoatining ishlab chiqarish va investitsiyaviy salohiyatini namoyish etuvchi stend bilan ishtirok etmoqda.
Forum doirasida tashrif buyuruvchilar va xorijiy investorlar uchun O‘zbekiston avtomobil sanoatida amalga oshirilayotgan yirik loyihalar, mahalliylashtirish jarayonlari hamda sanoat kooperatsiyasini rivojlantirish bo‘yicha erishilgan natijalar taqdim etilmoqda.
Stendda yengil avtomobillar, qishloq xo‘jaligi texnikalari, maxsus texnikalar hamda zamonaviy dvigatellar ishlab chiqarish yo‘nalishlari haqida batafsil ma’lumot berilgan. Shuningdek, avtomobilsozlik tarmog‘ida raqamli texnologiyalar va sun’iy intellekt yechimlarini joriy etish borasida amalga oshirilayotgan ishlar ham namoyish etilmoqda.
Ekspozitsiya orqali mahalliy ishlab chiqaruvchilarning imkoniyatlari, yangi investitsiya loyihalari, import o‘rnini bosuvchi mahsulotlar ishlab chiqarish bo‘yicha salohiyat hamda xalqaro hamkorlikni kengaytirish istiqbollari keng yoritilgan.
Toshkent xalqaro investitsiya forumi mamlakatimiz sanoat salohiyatini namoyish etish, yangi hamkorlik aloqalarini o‘rnatish va investitsiyalarni jalb etish uchun muhim platforma bo‘lib xizmat qilmoqda.
- 17/06/2026
- Bo'lim: Yangiliklar