Tashrif doirasida avtomobil sanoati korxonalarida inson resurslarini boshqarish, korporativ ta’lim tizimini rivojlantirish hamda xodimlar malakasini oshirish bo‘yicha ilg‘or tajribalarni almashish masalalariga alohida e’tibor qaratildi.
Tashrif ishtirokchilari “Allur” kompaniyasi va “KIA Qozog‘iston” korxonalarida bo‘lib, ishlab chiqarish jarayonlari, mehnatni tashkil etish tizimi, xodimlarni tayyorlash va ularning kasbiy rivojlanishini ta’minlashga qaratilgan mexanizmlar bilan yaqindan tanishdilar. Shuningdek, korxonalarda qo‘llanilayotgan zamonaviy boshqaruv yondashuvlari va korporativ ta’lim amaliyotlari bo‘yicha tajriba almashildi.
O‘quv-amaliy mashg‘ulotlar davomida mutaxassislar ishlab chiqarish jarayonlarida bevosita ishtirok etib, avtomobilsozlik sohasida kadrlar salohiyatini rivojlantirish, xodimlarning malakasini muntazam oshirib borish va samaradorlikni ta’minlash bo‘yicha tajriba almashdilar. Shu bilan birga, O‘zbekiston avtomobil sanoatida amalga oshirilayotgan islohotlar, erishilgan natijalar hamda tarmoqda kadrlar tayyorlash tizimini takomillashtirish borasida olib borilayotgan ishlar yuzasidan taqdimotlar o‘tkazildi.
Mazkur tashrif davomida olingan tajriba ikki tomonlama hamkorlikni rivojlantirishga xizmat qiladi.
- 12/06/2026
- Bo'lim: Yangiliklar