O‘zavtosanoat Kubogi turniri tizim korxonalarini b...
Korporativ ruhni mustahkamlash, sport va sog‘lom turmush tarzini targ‘ib etish maqsadida tizim korxonalari xodimlari o‘rtasida O‘zavtosanoat Kubogi futbol turniri o‘tkazildi.
Musobaqalarda jamiyat tarkibiga kiruvchi korxonalar jamoalari, jumladan, “UzAuto Cepla” QK MChJ, “UzAuto Motors” AJ, “UzAuto-Inzi” MChJ, shuningdek, Toshkentdagi Turin politexnika universiteti jamoasi ishtirok etdi.
Turnirning ilk bahsida “UzAuto Cepla” QK MChJ hamda Turin politexnika universiteti jamoalari o‘zaro kuch sinashdi. Qizg‘in va tomoshabop kechgan uchrashuvda universitet jamoasi 3:2 hisobida g‘alaba qozondi.
Keyingi o‘yinda “UzAuto Motors” AJ va “UzAuto-Inzi” MChJ jamoalari maydonga tushdi. Uchrashuv ilk daqiqalardanoq muxlislar tomonidan faol qo‘llab-quvvatlandi. “UzAuto Motors” jamoasi 3:0 hisobida ishonchli g‘alaba qozonib, musobaqaning keyingi bosqichiga yo‘l oldi.
Futbol uchrashuvlari do‘stlik, halol raqobat va jamoaviy birdamlik ruhida o‘tdi. Turnir tashkilotchilari ta’kidlaganidek, bunday sport tashabbuslari O‘zavtosanoat tizimi xodimlari o‘rtasida jamoaviy ruhni yanada mustahkamlashga xizmat qiladi.
Mazkur o‘yinlar O’zavtosanoat Kubogining dastlabki bosqichini tashkil etdi. Turnir davom etmoqda. Ishtirokchilarni oldinda yangi uchrashuvlar, yorqin hissiyotlar va faxrli kubok uchun hal qiluvchi bahslar kutmoqda.
