Ijtimoiy tarmoqlarda “UzAuto Motors” AJ xodimlari o‘rtasida avtomobillarni taqsimlash jarayonining go‘yoki yetarli darajada shaffof va adolatli emasligi haqida anonim murojaat tarqaldi.
Mazkur holat yuzasidan quyidagilarni ma’lum qilamiz.
Zavod xodimlari o‘rtasida avtomobillarni taqsimlash jarayoni “Random” nomli tasodifiy tanlashning avtomatlashtirilgan tizimi orqali amalga oshiriladi. Ushbu tizim jarayonga har qanday aralashuv imkoniyatini istisno etadi.
Jarayon ochiq tarzda, xodimlar ishtirokida o‘tkazilib, videoyozuv orqali qayd etiladi hamda ichki kommunikatsiya kanallari orqali namoyish etiladi. Shu bilan birga, barcha ishtirokchilar teng sharoitlarda qatnashadi va tizim tashqi aralashuv yoki alohida shaxslarga ustunlik berish imkoniyatini istisno etadi.
Avtomobillar qiymati mustaqil baholash asosida shakllantiriladi. Bunda ularning komplektatsiyasi, texnik holati, shuningdek mavjud nuqsonlar inobatga olinadi.
Xususan, 2026-yil 19-yanvar kuni o‘tkazilgan tanlov doirasida soz va foydalanishga yaroqli holatdagi Tracker avtomobilining Redline komplektatsiyasi 211 807 000 so‘m etib baholangan. Shu bilan birga, tamirtalab bo‘lgan va texnik nosozliklarga ega Tracker avtomobillarining Premier komplektatsiyasi 165 million so‘m miqdorida baholangan.
Narxlardagi farqlar transport vositalarining komplektatsiyasi va texnik holati kabi obyektiv omillar bilan izohlanadi.
Eslatib o‘tamiz, “UzAuto Motors” AJ barcha murojaatlarni diqqat bilan va belgilangan tartibda ko‘rib chiqadi.
Qo‘shimcha savollar yuzaga kelgan taqdirda, xodimlar Umumiy masalalar bo‘yicha tarkibiy bo‘linmalarga +99878-141-77-77 (3002) telefon raqami orqali murojaat qilishlari mumkin.
