“Uzavtosanoat” AJ barcha sanoat mahsulotlarini ishlab chiqaruvchilari qatorida Respublika tarmoqlararo kooperatsiya sanoat yarmarkasida ishtirok etmoqda. Sanoatning boshqa ishlab chiqaruvchilar bilan kooperatsiyasi, importni qisqartirish, mahalliy xomashyo va materiallardan foydalanish darajasini oshirish, shuningdek, ishlab chiqarilayotgan mahsulotlarning mahalliylashtirishni chuqurlashtirish va tarmoqlararo kooperatsiyani rivojlantirish ishtirok etishning maqsadidir.
Yarmarka doirasida UzAuto potensial hamkorlar bilan ochiq muloqot, muhokama, shuningdek, mahalliylashtirish loyihalari va “Uzavtosanoat” tarkibidagi korxonalar bilan kooperatsiya qilish imkoniyatlari bilan yaqindan tanishtirishni maqsad qilgan.
UzAuto ko’rgazma stendida “Uzavtosanoat” tarkibidagi korxonalar tomonidan ishlab chiqarilgan butlovchi qismlar va materiallar koʻrgazmali tarzda namoyish etiladi. Shuningdek, O’zbekiston hududida, shu jumladan, mavjud korxonalarning ishlab chiqarish quvvatlarida zarur detall va butlovchi qismlar ishlab chiqarishni tashkil etish mumkin bo‘lgan yo‘nalishlar bilan ham tanishishingiz mumkin.
Bundan tashqari, UzAuto tarkibidagi korxonalarda ishlab chiqarilgan yuk avtomobillari, maxsus texnika va qishloq xo‘jaligi texnikasi mahsulotlari namoyish etilmoqda. Xususan, qishloq xo‘jaligi mashinasozligi korxonalari tomonidan traktorlar, tirkama va boshqa maxsus qurilmalar ko‘rinishidagi bir qator qishloq xo‘jaligi texnikalari bilan yaqindan tanishingiz mumkin.
Qolaversa, «UzAuto Motors» AJ tomonidan ishlab chiqarilgan Chevrolet avtomobillari bilan yaqindan tanishishingiz mumkin. Shuningdek, ko’rgazma ishtirokchilariga Jizzax avtomobil zavodining Volkswagen Caddy va ŠKODA rusumli avtomobillar qatori, Isuzu Di-Max pikaplari, UZ Truck & Bus Motors, UzAuto TRAILER va Samarqand avtomobil zavodi tomonidan ishlab chiqarilgan yuk mashinalar va avtobuslar namoyish etiladi.
Sanoat yarmarkasi doirasi ishtirokchilar bir-birlarining imkoniyatlari, taklif va ehtiyojlari bilan yaqindan tanishishlari, hamkorlik masalalari bo‘yicha muzokaralar olib borishlari, shuningdek, hamkorlik shartnomalarini imzolash imkoniyatiga ega bo‘lishadi.
“Respublika tarmoqlararo kooperatsiya sanoat yarmarkasi” O‘zekspomarkazda joriy yilning 18 noyabriga qadar davom etadi.
- 14/11/2022
- Bo'lim: Yangiliklar