Bugungi kunda ijtimoiy tarmoqlarda Chevrolet avtomobillari haqida bila turib yolg‘on yoki haqiqatga to’g’ri kelmaydigan ma’lumotlarning tarqatilish holatlarini tez-tez uchratmoqdamiz.
Kecha detailing markazining Instagram’dagi sahifalaridan birida “Salondan Gentra olganlar “Airbag”ni tekshirib ko‘ringlar, Airbag yo‘q ekan” deb nomlangan video chiqdi va ijtimoiy tarmoqlarda keng tarqaldi.
Uzauto Motors ushbu videoni e’tiborsiz qoldirolmadi. Chunki sifat nazorati tizimi bunga umuman yo’l qo’ymaydi.
O’rganishlar jarayonida haqiqatdan ham deyarli yangi bo’lgan avtomobil egasi YTH ishtirokchisi bo’lganligi, buning natijasida esa xavfsizlik yostiqchasi ishlab ketganligi aniqlandi.
Video muallifi holatga batafsil oydinlik kiritilgandan so’ng, vaziyatni to’liq bilmagan holda noto’g’ri ma’lumot berganligini tan olib o’z murojaatini yozdi.
UzAuto Motors kompaniyasi video muallifiga tezkor javob uchun samimiy minnatdorchilik bildiradi va Chevrolet avtomobillari bilan bog‘liq muammolarni yoritishni xohlovchilarning xolis bo’lishiga umid qiladi.
UzAuto Motors bunday yolg‘on xabarlar tarqalayotganiga tez-tez guvoh bo‘lmoqda. Ushbu haftaning o’zida kompaniya ikki marta yolg’on xabarlarga munosabat bildirishga majbur bo’ldi. Go’yoki uzilib tushgan damas eshigi bilan bog’liq holat obunachilarni ataylab yo’ldan ozdirgan eng aniq keys edi. https://t.me/uzauto_official/2028
Hurmatli xaridorlar, internetda tarqatilayotgan har qanday tasdiqlanmagan ma'lumotlarga ishonmasligingizni so‘raymiz!
Shuningdek, tuhmat, bila turib yolg‘on hamda uydirmalarni tarqatganlik uchun Ma’muriy javobgarlik to‘g‘risidagi Kodeksning 40-moddasida ko‘zda tutilgan bazaviy hisoblash miqdorining 20 baravaridan 60 baravarigacha miqdorda jarima solishga sabab bo‘lishi hamda shunday harakatlar uchun ma’muriy jazo qo‘llanilishini eslatib o‘tmoqchimiz.
“UzAuto Motors” kompaniyasi har qanday holatda xaridorlari va mijozlari bilan konstruktiv muloqotda bo’lishga tayyorligini ma’lum qiladi.
