Rasmiy munosabat: “Uzavtosanoat” AJ kuzatuv kengashi

Bugun “КорпИнфо” tematik telegram kanalida “UzAuto Motors” AJ bosh direktori Bo Inge Andersson kiritilgan “Uzavtosanoat” AJ kuzatuv kengashi tarkibi to’g’risida ma’lumot e’lon qilindi. 

Shuningdek, xabarda ushbu tayinlov “Aksiyadorlik jamiyatlari va aksiyadorlarning huquqlarini himoya qilish to'g'risida”gi Qonunning 76-moddasiga zid ekanligi, unga ko’ra Jamiyat boshqaruvi a’zolari va direktori, uning sho‘ba va tobe xo‘jalik jamiyatlarida mehnat shartnomasi (kontrakt) bo‘yicha ishlayotgan shaxslar va ushbu jamiyatlar boshqaruv organlarining a’zolari jamiyatning kuzatuv kengashiga saylanishi mumkin emasligi haqidagi talablarni buzganligi notoʻgʻri keltirilgan.

Yuqoridagilar yuzasidan kompaniya “UzAuto Motors” AJ 100 % ulushining yagona aksiyadori “Uzauto Passenger Vehicles Managment” MCHJ hisoblanishini ma’lum qiladi.

O’zbekiston Respublikasi fuqarolik kodeksining 67-moddasiga muvofiq agar bir (asosiy) xo‘jalik jamiyati ikkinchi xo‘jalik jamiyatining ustav fondida undan ustunlik mavqeyiga ega bo‘lgan holda ishtirok etishi tufayli ikkinchi xo‘jalik jamiyati tomonidan qabul qilinadigan qarorlarni belgilab berish imkoniga ega bo‘lsa, ushbu ikkinchi xo‘jalik jamiyati sho‘ba xo‘jalik jamiyati deb tan olinadi. "Aksiyadorlik jamiyatlari va aktsiyadorlarning huquqlarini himoya qilish to'g'risida"gi Qonunning 8-moddasiga binoan, agar boshqa ishtirok etuvchi jamiyat xo‘jalik jamiyatining ovoz beruvchi aksiyalarining (ulushlarining) yigirma foizidan ortig‘iga ega bo‘lsa, xo‘jalik jamiyati tobe deb e’tirof etiladi.

Yuqoridagilardan kelib chiqib, keltirib o’tilgan faktlarda “UzAuto Motors” AJ “O‘zavtosanoat” AJning sho‘ba va tobe xo‘jalik korxonalari ro‘yxatiga kiritilmagan. Ushbu faktni inobatga olgan holda, “UzAuto Motors” AJ “Uzavtosanoat” AJning sho‘ba va tobe xo‘jalik korxonasi hisoblanmaydi.

Haqiqatdan ham "Uzavtosanoat" AJ va "UzAuto Motors" AJ affillangan shaxslar hisoblanadi, ammo “Aksiyadorlik jamiyatlari va aksiyadorlarning huquqlarini himoya qilish to'g'risida”gi Qonunda va har ikki jamiyatning ta'sis hujjatlarida affillangan shaxslarni Kuzatuv kengashlariga saylashda cheklovlar mavjud emas.

www.uzavtosanoat.uz

• event 14/09/2022
• local_offer Bo'lim: Yangiliklar
• thumb_up Yoqdi (0)
• thumb_down Yoqmadi (0)