Bugun "O'zavtosanoat" AJ oldida kompaniya faoliyati samaradorligini yuqoriga ko'tarish, yengil avtomobillar va tijorat texnikalarini ishlab chiqarish sohasida ishonchli mahsulotlar hamda xizmat turlarini yaratish, rentabellikni oshirish, shuningdek, ishlab chiqarish sohasida kadrlar salohiyatini yuksaltirish kabi muhim vazifalar turibdi.
Bugungi kunda "O'zavtosanoat" AJ 60ga yaqin korxonalarni o'zida jamlagan, shuningdek, 30 ming nafar xodim faoliyat yurituvchi O'zbekistondagi eng yirik kompaniyalardan biri hisoblanadi.
Asosiy ko'rsatkichlar
Birinchi yarim yillikda "O'zavtosanoat" AJ tizimida yangi loyihalarning amalga oshirilishi hisobiga 3 000 ta yangi ishchi o'rni yaratildi. Ishlab chiqarish hajmining oshirilishi yengil avtomobillar bo'yicha qarzdorlikni 2 barobarga qisqartirish imkonini bergan bo'lsa, davlat byudjetiga to'lanadigan soliq to'lovlari miqdori 3,4 trillion so'mga yetkazildi.
Eksport hajmining oshirilishi mamlakatga valyuta tushumini keltiruvchi asosiy omil ekanligini anglagan holda, "O'zavtosanoat" tizim korxonalari tomonidan 307,3 million dollar miqdoridagi yuqori qo'shilgan qiymatga ega mahsulotlar eksport qilindi, bu ko'rsatkich o'tgan yilning mos davriga nisbatan 40%ga oshganini anglatadi. Qolaversa, 2023-yilning birinchi yarmida importni qisqartirish dasturining amalga oshirilishi natijasida import 71,7 million dollarga qisqardi.
Ishlab chiqarish faoliyati
2023 yilning I yarmida Kompaniya tarmoq korxonalari tomonidan 25,2 trillion so'mlik mahsulot ishlab chiqarilgan bo'lib, bu o'tgan yilning mos davriga nisbatan 13%dan ko'p. Ushbu davr mobaynida 160 ming dona yengil avtomobillar, 1,2 ming dona avtobus va yuk avtomobillari, 1,3 ming dona qishloq xo'jaligi texnikalari hamda 105 ming dona dvigatellar ishlab chiqarish liniyalaridan chiqarildi.
Rekordlar
"O'zavtosanoat" jamoasining samarali mehnati natijasida 2023-yilning I yarmida quyidagi rekord raqamlarning o'rnatilishiga erishildi.
- Asaka va Pitnakdagi "UzAuto Motors" zavodlarida oyiga 39 040 dona avtomobil ishlab chiqarildi.
- Asakadagi "UzAuto Motors" zavodida oyiga 29 900 dona hamda kuniga 1,7 ming dona avtomobil ishlab chiqarishga erishildi.
- Pitnakdagi "UzAuto Motors" zavodida oyiga 11 250 dona hamda kuniga 450 dona avtomobil ishlab chiqarildi.
BYD bilan hamkorlik
Joriy yilning may oyida O‘zbekiston Respublikasi Prezidenti Shavkat Mirziyoyev yurtimizda elektromobillar ishlab chiqarishga ixtisoslashgan “BYD Uzbekistan Factory” zavodi qurilishiga start berdi. Bu Xitoyning elekromobil ishlab chiqarish bo'yicha jahon yetakchisining Xitoydan tashqaridagi birinchi qo‘shma korxonasi hisoblanib, O'zbekiston avtomobilsozligi yutuqlari hamda mamlakatimizning iqtisodiy jozibadorligi sabab bunday imkoniyatga yo'l ochildi.
"Jizzakh Auto" zavodi negizida tashkil etilgan "BYD Uzbekistan Factory" zavodi birinchi bosqichda yiliga 50 mingdan ortiq NEV rusumidagi BYD Chazor va Song Plus modellarini ishlab chiqarish quvvatiga ega uskunalar bilan jihozlanadi. Kelgusida ularni to'liq tsiklda ishlab chiqarish bazasi (CKD: shtamplash, payvandlash, bo'yash, yig'ish) yo'lga qo'yiladi. Bu o'z o'rnida, korxonada 2 mingdan ortiq yangi ish o'rinlari yaratish imkonini beradi.
"UzAuto Motors Powertrain" zavodida yangi mexanik ishlov berish liniyasi
Iyul oyida "O'zavtosanoat"AJ tarkibiy korxonasi hisoblangan "UzAuto Motors Powertrain" zavodida Chevrolet Tracker va Onix avtomobillarini ishlab chiqarishda foydalaniladigan yangi avlod CSS Prime dvigatellarining Machining head va Silindr bloklari liniyalarni ishga tushirdi.
Ishlov berish liniyasining ishga tushirilishi CSS Prime dvigatellarining mahalliylashtirish darajasini oshirilishiga, shuningdek, komponentlarni to'g'ridan to'g'ri yig'uv liniyasiga yetkazib berish orqali sifatning ham ortishiga sabab bo'ladi. Kelgusida dvigatellarning mahalliylashtirish darajasini yanada oshirish maqsadida Silindr bloki va Machining head yuqori bosimda ishlab chiqaruvchi quyuv sexini ishga tushirish rejalashtirilgan. Eslatib o'tamiz, o'tgan yilning dekabr oyida CSS Prime dvigatellarini ishlab chiqarish liniyasi ishga tushirilishgach, zavodning yillik ishlab chiqarish quvvati 415 ming donaga yetdi.
- 31/07/2023
- Bo'lim: Yangiliklar