Joriy yilning 15–16-iyul kunlari Samarqand viloyatida joylashgan “Sof Expo Samarkand” majmuasida “Milliy sanoat zanjiri” ko‘rgazmasi bo‘lib o‘tdi.
Mahalliy ishlab chiqaruvchilar, yirik sanoat korxonalari va buyurtmachilarni yagona maydonda birlashtirgan ko‘rgazma sanoat kooperatsiyasini kengaytirish, import o‘rnini bosuvchi mahsulotlarni o‘zlashtirish, mahalliylashtirish darajasini oshirish hamda yangi hamkorlik loyihalarini shakllantirishga xizmat qildi.
Ko‘rgazmada “O‘zavtosanoat” AJ tizim korxonalari, jumladan, “UzAuto Motors” AJ R&D markazi o‘zining zamonaviy muhandislik imkoniyatlari, innovatsion ishlanmalari va istiqbolli loyihalarini taqdim etdi.
Tadbir ishtirokchilariga markazning teskari muhandislik (Reverse Engineering), qolipsozlik muhandisligi (Tooling Engineering), tannarx muhandisligi (Cost Engineering) hamda Sanoat 4.0 (Industry 4.0) yo‘nalishlaridagi faoliyati haqida batafsil ma’lumot berildi. Shuningdek, ishlab chiqarish jarayonlarini takomillashtirish, mahsulot tannarxini maqbullashtirish, mahalliylashtirishni kengaytirish va zamonaviy raqamli yechimlarni joriy etishga qaratilgan loyihalar namoyish qilindi.
Ko‘rgazma davomida R&D markazining muhandislik xizmatlari va texnologik imkoniyatlari ishtirokchilarda katta qiziqish uyg‘otdi. Turli sanoat korxonalari bilan hamkorlikning istiqbolli yo‘nalishlari muhokama qilinib, ularning ishlab chiqarish ehtiyojlarini o‘rganish va tegishli muhandislik yechimlarini ishlab chiqish bo‘yicha kelishuvlarga erishildi.
Ayniqsa, qolipsozlik muhandisligi yo‘nalishidagi xizmatlarga ehtiyoj yuqori ekani qayd etildi. Shu munosabat bilan manfaatdor korxonalarning ishlab chiqarish jarayonlarini joyiga chiqqan holda o‘rganish, zarur qolip va texnologik yechimlarga bo‘lgan ehtiyojlarini aniqlash hamda aniq hamkorlik loyihalarini shakllantirish rejalashtirildi.
“O‘zavtosanoat” AJning mazkur ko‘rgazmadagi ishtiroki avtomobilsozlik tarmog‘ida to‘plangan ilmiy-texnik tajriba va muhandislik salohiyatini tarmoqlararo sanoat kooperatsiyasini rivojlantirish hamda mahalliy ishlab chiqaruvchilarning texnologik imkoniyatlarini kengaytirishga xizmat qiladi.
- 17/07/2026
- Bo'lim: Yangiliklar