Respublika nashrlaridan birida O’zbekistonda elektromobillar savdosi sezilarli darajada oshgani haqidagi maqola chop etilgan edi. “O’zavtosanoat” mavjud muammolarga befarq bo’lmagan holda o’z munosabatini bildirgan nashriyotga minnatdorchilik bildiradi hamda kompaniyaning tarkibiy bo'linmalardan biri hisoblangan "UzAuto Motors" zavodida ayni paytda ishlab chiqarish hajmining doimiy ravishda o'sib borayotganiga qaramay, mamlakatning avtomobillarga bo’lgan yuqori talabini to'liq qoplay olmayotganini tan oladi.
Respublika iqtisodiyotining barqaror o’sishi hamda aholi turmush farovonligining oshishi natijasida milliy avtomobilsozlik mahsulotlariga bo’lgan talabning ortish darajasini tabiiyki, 6 yil avvalgi ko’rsatkichlar bilan taqqoslab bo’lmaydi. Bugungi kunda mahalliy bozor aynan raqobatbardosh avtomobil brendlari uchun yanada jozibador bo’lib borayotganini sezish qiyin emas.
"O'zavtosanoat" doimiy ravishda mavjud xalqaro brendlarni o'rganib bormoqda va dunyodagi avtomobilsozlik sohasining yetakchilari bilan hamkorlik va kooperatsion munosabatlarni yo'lga qo'yish maqsadida yangi imkoniyatlarni izlamoqda. Qolaversa, O'zbekistonda zamonaviy hamda ekologik jihatdan dolzarb bo'lgan avtoparklar sonini ko'paytirishga qiziqish bildirmoqda.
Shunday qilib, joriy yilning may oyida “O’zavtosanoat” AJ hamda "BYD Company Ltd." hamkorligida O'zbekistonda elektromobillar ishlab chiqarishga ixtisoslashgan "BYD Uzbekistan Factory" zavodining qurilishi boshlandi.
Statistik ma’lumotlardan ko’rish mumkinki, joriy yilda O’zbekistonga olib kelingan 5 400dan ortiq elektromobillarning 3 255 donasi mahalliy bozor dasturini o’rganish doirasida “O’zavtosanoat” AJ tarkibiy bo’linmasi sanalgan “BYD Factory Uzbekistan” kompaniyasi tomonidan yetkazib berilgan.
“O’zavtosanoat” konstruktiv muloqot o’rnatish tarafdori bo'lib O’zbekistonda ekologik toza transportlar ulushini ko’paytirish, bozorni yanada erkinlashtirish qolaversa, mamlakat avtomobil bozoriga yangi avtokonsernlarning kirib kelishidan manfaatdor ekanini ma’lum qiladi. Bu, albatta, ichki bozorda avtomobillarning raqobatbardoshligini oshirishga ijobiy ta’sir ko‘rsatadi va avtomobil ishlab chiqaruvchilarning rivojlanishini rag‘batlantirish uchun barcha sharoitlarni yaratadi.
- 27/07/2023
- Bo'lim: Yangiliklar