Ijtimoiy tarmoqlarda “UzAuto Motors” AJdagi mehnat munosabatlari, ishchi xodimlar va xorijiy mutaxassislarga to‘lanadigan ish haqi, shuningdek, ishlab chiqarilayotgan mahsulot sifati haqida anonim murojaat tarqatildi.
Shu munosabat bilan quyidagilarni ma’lum qilamiz.
Avvalo, korxona faoliyatiga doir masalalar ko‘tarilgan mazkur murojaat uchun muallifga minnatdorchilik bildiramiz. “UzAuto Motors” AJda bunday murojaatlarga jiddiy e’tibor qaratiladi hamda xodimlarning fikr va takliflari ishlab chiqarish jarayonlari va korporativ muhitni yanada takomillashtirishga xizmat qiluvchi muhim omillardan biri sifatida baholanadi.
Shuni ta’kidlash joizki, kompaniya tomonidan mehnatga haq to‘lash tizimi va xodimlarni moddiy rag‘batlantirish masalalari bo‘yicha ommaviy axborot vositalarida e’lon qilingan avvalgi materiallar va murojaatlarga nisbatan bir necha bor batafsil rasmiy izohlar berilgan.
Shuningdek, ushbu masalalar yuzasidan kompaniya rahbariyati tomonidan har bir tarkibiy bo‘linma xodimlari va ishchilari bilan uchrashuvlar o‘tkazilib, zarur tushuntirishlar berilgan. Korxonada har oyda xodimlar bilan ochiq muloqotlar tashkil etiladi, shuningdek, doimiy aloqa va muloqot kanallari yo‘lga qo‘yilgan.
Ayni paytda “UzAuto Motors” AJ bozor sharoitida va raqobat muhitida faoliyat yurituvchi tijorat korxonasi ekanligini alohida qayd etamiz.
Yana bir bor eslatib o‘tamizki, so‘nggi uch yil davomida korxonaning ishlab chiqarish bo‘linmalari xodimlarining o‘rtacha ish haqi 22 foizga oshirildi. Bunda ma’muriy-boshqaruv xodimlarining ish haqi oshirilmagan.
Bundan tashqari, xodimlarga mehnat faoliyati natijalariga asoslangan holda har chorakda KPI mukofotlari to‘lab boriladi. Shuningdek, keyingi yillarda davlat bayramlari munosabati bilan qo‘shimcha rag‘batlantiruvchi to‘lovlar berish amaliyoti joriy etildi.
Xodimlarning ish haqi, shu jumladan ustama va rag‘batlantiruvchi to‘lovlar miqdori egallab turgan lavozimi, malakasi, tajribasi, mehnat natijalari hamda kompaniya faoliyatiga qo‘shgan shaxsiy hissasini inobatga olgan holda belgilanadi. Shu munosabat bilan ish haqi va rag‘batlantiruvchi to‘lovlar miqdori lavozim, faoliyat yo‘nalishi hamda har bir xodimning ish samaradorligiga qarab farq qilishi mumkin.
Xorijiy mutaxassislar faoliyati va ularning ish haqi masalasiga kelsak, hozirgi kunda korxonada 15 mingdan ortiq xodim mehnat qilmoqda. Xorijiy mutaxassislar soni esa atigi 21 nafarni tashkil etadi, bu umumiy xodimlar sonining 1 foizidan ham kamdir.
Xorijiy mutaxassislar ishlab chiqarish samaradorligini oshirish, mahalliy sanoat raqobatbardoshligini kuchaytirish, kadrlar salohiyatini rivojlantirish hamda xarajatlarni optimallashtirish bo‘yicha ilg‘or xalqaro tajribalarni joriy etish maqsadida jalb qilingan.
Ushbu mutaxassislar, birinchi navbatda, muayyan davrda korxona uchun dolzarb bo‘lgan muammolar va alohida vazifalarni hal etish bilan shug‘ullangan.
Ta’kidlash lozimki, jalb qilingan mutaxassislar faoliyati o‘zini to‘liq oqlagan bo‘lib, ular tomonidan amalga oshirilgan yechimlardan olingan iqtisodiy samara kompaniyaning ularni saqlash xarajatlaridan bir necha barobar yuqori hisoblanadi.
Kompaniya ochiq kadrlar siyosatini yuritadi va mehnatga haq to‘lash tizimi bo‘yicha norozilik, savol yoki tushunmovchiliklarga ega bo‘lgan har bir xodimning murojaatini alohida tartibda ko‘rib chiqishga tayyor. Murojaatlarni xolisona ko‘rib chiqish maqsadida kadrlar, yuridik xizmatlar, kasaba uyushmasi hamda mas’ul rahbar xodimlar jalb etiladi.
Har bir manfaatdor xodim kompaniya rahbariyatiga shaxsan yoki mavjud muloqot kanallari orqali murojaat qilishi mumkin. Buning uchun +998 78 140 55 55 telefon raqami yoki @uzautomotors_infobot Telegram-botidan foydalanish mumkin.
Ishlab chiqarilayotgan mahsulot sifati masalasiga kelsak, so‘nggi uch yil davomida mazkur yo‘nalishda salmoqli natijalarga erishildi. Ilgari har 1 000 ta ishlab chiqarilgan avtomobil hisobiga o‘rtacha 35 ta sifat bilan bog‘liq holat to‘g‘ri kelgan bo‘lsa, bugungi kunda ushbu ko‘rsatkich 13 tani tashkil etmoqda.
Natijada mazkur holatlar soni qariyb uch barobarga qisqardi. Bu esa ishlab chiqarish jarayonlari va sifat nazorati tizimi izchil takomillashtirib borilayotganidan dalolat beradi.
Yana bir bor eslatib o‘tamizki, “UzAuto Motors” AJ ochiq muloqot tamoyillariga amal qiladi va kelib tushayotgan har bir murojaatga jiddiy yondashadi. Barcha murojaatlar belgilangan tartibda ko‘rib chiqilishi kafolatlanadi.
