Ijtimoiy tarmoqlarda yo‘l-transport hodisasiga Chevrolet Cobalt avtomobilining tormoz tizimidagi nosozlik sabab bo‘lgani ta’kidlangan xabar tarqalmoqda.
Shu munosabat bilan quyidagilarni ma’lum qilamiz.
Mazkur holat yuzasidan tekshiruv o‘tkazildi.
Tekshiruv davomida Chevrolet Cobalt seriyali avtomobilining tormoz tizimi nazorat sinovlaridan o‘tkazilib, konditsioner tizimi yoqilgan va o‘chirilgan holatlarda bir qator keskin to‘xtash sinovlari amalga oshirildi.
Sinov natijalariga ko‘ra, tormoz tizimi barcha rejimlarda barqaror va to‘g‘ri ishlagani aniqlandi. Tormoz tizimining ishlamay qolishi, tormozlash samaradorligining pasayishi yoki konditsioner ishlashining tormoz tizimi faoliyatiga salbiy ta’siri bilan bog‘liq holatlar aniqlanmadi.
Shunday qilib, o‘tkazilgan tekshiruv davomida Chevrolet Cobalt seriyali modelining tormoz tizimida texnik yoki konstruktiv nosozlik mavjudligi haqidagi taxmin o‘z tasdig‘ini topmadi. Shuningdek, sinov natijalari konditsioner tizimining yoqilishi bilan tormoz tizimining ishlash samaradorligi o‘rtasida biror-bir bog‘liqlik mavjudligini tasdiqlamadi.
Shu bilan birga, yo‘l-transport hodisasiga turli omillar, jumladan, haydovchining xatti-harakatlari, avtomobildan foydalanish xususiyatlari hamda xavfsiz masofaga rioya qilmaslik sabab bo‘lishi mumkin. Xabarda qayd etilgan yo‘l-transport hodisasining aniq sababini faqat avtomobil va sodir bo‘lgan hodisaning barcha holatlarini kompleks o‘rganish natijasida aniqlash mumkin.
Avtomobil ta’mirlash ishlari amalga oshirilishidan oldin taqdim etilgan taqdirda, kompaniya har tomonlama texnik tekshiruv o‘tkazishga tayyor.
“O‘zavtosanoat” AJ iste’molchilarning barcha murojaatlariga alohida e’tibor bilan yondashadi hamda har bir holat belgilangan tartibda zarur texnik tekshiruvlar o‘tkazilgan holda ko‘rib chiqilishini ta’minlaydi.
