O‘zbekistonda eng ko‘p sotilayotgan avtomobillar o...
O‘zbekistonga yengil avtomobillar importining sezilarli darajada oshishiga qaramay, Chevrolet brendi mamlakatda eng ko‘p sotiladigan avtomobil markasi bo‘lib qolmoqda. Konsolidatsiyalangan ma’lumotlarga ko‘ra, 2023 yilda Chevrolet o‘z savdosini 31% ga oshirib, ichki bozorda 369 980 dona avtomobil sotdi. Biroq, shunga qaramay, mahalliy ishlab chiqaruvchi o‘z bozor ulushini saqlab qola olmadi – yil davomida u 90,6% dan 81,9% gacha kamaydi.
Yil yakunlariga ko‘ra, ikkinchi o‘rinni 3,3% bozor ulushi bilan Kia egalladi, uchinchi o‘rinda Chery (2,1%), to‘rtinchi o‘rinda esa elektromobillar va gibridlarga urg‘u berayotgan yana bir Xitoy brendi – BYD (2%) joy oldi. Hyundai esa, Rossiyadan mashina komplektlari yetkazib berilishi to‘xtatilgani sababli, savdosi sezilarli darajada kamayib, bozor ulushi o‘tgan yilga nisbatan 10 baravarga qisqardi va 0,2% ni tashkil qildi.
O‘zbekiston bozorida eng ko‘p sotilgan avtomobillar o‘nligida yetti model Chevrolet’ga tegishli. Eng mashhur beshta model quyidagicha taqsimlandi: Damas (Labo bilan birgalikda), Cobalt, Lacetti, Tracker va Onix. Ushbu barcha modellar mahalliy ishlab chiqarish mahsulidir.
Oltinchi o‘rinda Xitoyning BYD Song Plus modeli joylashgan. Ettinchi pog‘onani Chery Tiggo 7 PRO egallagan bo‘lsa, sakkizinchi o‘ringa Kia Sportage joylashdi. To‘qqizinchi va o‘ninchi o‘rinlarni yana ikkita Chevrolet modeli – Malibu va Equinox band qildi.
Yigirmatalikning ikkinchi yarmi quyidagicha shakllandi: Kia K5, mahalliy ishlab chiqarilgan Chevrolet Nexia, Kia Seltos va Sorento, BYD Chasor, Chevrolet Spark, Chery Arrizo va Tiggo 8 PRO, Kia Bongo hamda Volkswagen Caddy.
