Toshkent politexnika muzeyida “Nauka 0+” xalqaro...
1–2 noyabr kunlari Toshkent politexnika muzeyida O‘zbekiston va Rossiya hamkorligida IV “Nauka 0+” xalqaro ilmiy festivali bo‘lib o‘tdi. Mazkur festival yoshlarni ilmiy tadqiqotlar, innovatsiyalar va kashfiyotlar orqali rivojlantirishga yo‘naltirilgan bo‘lib, bu yilgi asosiy mavzusi “Sening kvant realliging” deb nomlandi. Tadbir BMT tomonidan e’lon qilingan Xalqaro kvant fanlari va texnologiyalari yiliga bag‘ishlandi.
Festivalning eng muhim jihatlaridan biri - unda kichik yoshdagi bolalardan tortib, kattalargacha bo‘lgan ishtirokchilar uchun teng imkoniyatlar yaratilganidir. Tadbir yosh tadqiqotchilar, talabalar, olimlar, shuningdek ilm-fan, texnika va innovatsiyalarga qiziquvchi keng jamoatchilikni birlashtirgan o‘ziga xos ilmiy platformaga aylandi.
Festivalda Rossiya Fan va oliy ta’lim vazirligi, M.V. Lomonosov nomidagi Moskva davlat universiteti, Rossiya fanlar akademiyasi hamda O‘zbekistonning yetakchi oliy ta’lim muassasalari vakillari ishtirok etdilar.
