“O‘zavtosanoat”da UzAuto Motors dilerlik markazlari rahbarlari bilan uchrashuv bo‘lib o‘tdi

Mazkur tadbir UzAuto Motors va uning dilerlik markazlarining yil davomida amalga oshirgan faoliyat natijalari muhokama qilish, avtomobil sanoatining kelgusidagi rivojlanish rejalari haqida fikr almashish maqsadida tashkil etildi.

Uchrashuv davomida joriy yilning 11 oyida UzAuto Motors dilerlik markazlari bilan hamkorlikda 331,7 ming dona yengil avtomobil sotilgani qayd etildi. Aholi uchun yangi imkoniyatlar yaratish maqsadida zamonaviy marketing usullari — chegirmalar, muddatli to‘lovlar, bank kreditlari va savdoni rag‘batlantirishga qaratilgan boshqa samarali mexanizmlar joriy etilgani ta’kidlandi.

Uchrashuvda xizmat sifatini yaxshilash, kafolatli xizmatlar ko‘lamini kengaytirish va avtomobillar imkoniyatlarini takomillashtirish masalalariga alohida e’tibor qaratildi. Savdo va marketing sohasidagi natijalar bilan bir qatorda ayrim dilerlik markazlari faoliyatidagi kamchiliklar ham tanqidiy tahlil qilindi.

Xususan, bugungi kunda O‘zbekistonda Chevrolet brendi ostida faoliyat yuritayotgan 91 ta dilerlik markazlarining faoliyati tasdiqlangan korporativ standartlarga mos ekani qayd etildi. Ammo, shulardan 8 tasi D2/D3 standartlari bo‘yicha autorizatsiyadan o‘ta olmagani bildirildi. Shu munosabat bilan, dilerlik markazlari rahbarlariga dilerlik shartnomasini to‘liq amalga oshirishga alohida e’tibor qaratish tavsiya etildi.

Dilerlik markazlari rahbarlari savdo faoliyatini yaxshilash, mutaxassislarning malakasini oshirish, xodimlar uchun maxsus o‘quv kurslarini tashkil etish va boshqa yo‘nalishlarda takliflar bildirishdi.

Tadbir yakunida bunday uchrashuvlarni muntazam ravishda o‘tkazish bo‘yicha kelishuvga erishildi.

• event 05/12/2024
• local_offer Bo'lim: Yangiliklar
• thumb_up Yoqdi (0)
• thumb_down Yoqmadi (0)