Korrupsiyaga qarshi kurashish agentligi tomonidan tashkil etilgan VI Toshkent aksilkorrupsiya forumida “O‘zavtosanoat” AJ faoliyatida ochiqlik, shaffoflik va hisobdorlik tamoyillarini izchil joriy etish borasida amalga oshirilayotgan ishlar yuksak e’tirof etilib, kompaniya maxsus mukofot bilan taqdirlandi.
“Korrupsiyaga qarshi boshqaruvning yangi arxitekturasi: samarali preventiv choralar sari” shiori ostida tashkil etilgan forum korrupsiyaga qarshi kurashish yo‘nalishida xalqaro hamkorlikni rivojlantirish, ilg‘or tajriba almashish hamda ochiqlik tamoyillarini mustahkamlashga bag‘ishlandi.
Mazkur nufuzli tadbirda Qozog‘iston, Ozarbayjon, Yaponiya, Estoniya, Litva, Qirg‘iziston hamda boshqa qator davlatlarning vakillari, xalqaro tashkilotlar ekspertlari va davlat idoralari mutasaddilari ishtirok etdi. Forum doirasida zamonaviy komplayens tizimlari, preventiv mexanizmlar, korrupsiyaviy xavflarning oldini olish hamda institutsional shaffoflikni ta’minlash masalalari muhokama qilindi.
Bugungi kunda “O‘zavtosanoat” AJ tizimida faoliyat ochiqligini ta’minlash, axborotlarni o‘z vaqtida va to‘liq e’lon qilib borish, jamoatchilik bilan ochiq muloqotni kuchaytirish hamda korrupsiyaviy xavflarning oldini olishga qaratilgan samarali mexanizmlar joriy etilgan. Mazkur yondashuv kompaniyada shaffoflik va hisobdorlikni mustahkamlashga xizmat qilmoqda.
Ma’lumot uchun, “Ochiqlik indeksi” reytingining 2025-yil yakunlariga ko‘ra, “O‘zavtosanoat” AJ 94,2 ball bilan eng yuqori natijalarni qayd etgan tashkilotlar qatoridan joy oldi.
- 12/05/2026
- Bo'lim: Yangiliklar