Uning “UzAuto Motors Powertrain” kompaniyasidagi karerasi amaliyotni muvaffaqiyatli o‘tashdan boshlandi, keyin kompaniyaning Logistika departamentida butlovchi detallarni muvofiqlashtirish mutaxassisi maqomida ish boshladi. Hozirda Farangis Logistika departamenti boshlig‘i lavozimida ishlaydi.

Biz ruknimiz qahramoni bilan suhbatlashdik va hayotidagi asosiy voqealardan xabardor bo‘ldik.

Kompaniyadagi xodimlarni rivojlantirish dasturi borasidagi shaxsiy namunangiz qanday bo‘ldi?

“UzAuto Motors Powertrain”da xodimlarni rivojlantirish va o‘qitishning juda samarali tizimi mavjud. Men Germaniya va Vengriyadagi yirik zavodlarda bilim oldim, u yerda mahalliy xodimlar o‘z tajribalari bilan bajonudil o‘rtoqlashdilar. 2018 yilda ITAP dasturi bo‘yicha Tailandga, biznikiga o‘xshash zavodga ishchi jarayonlar bilan tanishish va taqqoslash uchun yuborildim.

Yetkazib berishlar zanjiri sohasidagi faoliyatimning boshidanoq men katta amaliy tajriba oldim, ammo uni nazariy bilimlar bilan mustahkamlash istagi tug‘ildi. Shu sababli, 2016-2019 yillarda ishim bilan parallel ravishda, men MBA – Biznesni boshqarish sohasida magistraturada “Global logistika va yetkazib berishlar zanjiri” yo‘nalishida Toshkent shahridagi Singapur menejmentni rivojlantirish institutida o‘qidim. “O‘qishga xarajatlarni qoplash” siyosatiga muvofiq, kompaniya ta’lim olishga sarflagan xarajatlarimning bir qismini qoplab berdi.

Fikringizcha, “UzAuto Motors Powertrain” boshqa kompaniyalardan nimasi bilan ajralib turadi?

Kompaniyamizda jarayonlar yaxshi yo‘lga qo‘yilgan, ular standartlashtirilgan va shunday qurilganki, agar kompaniyaga yangi xodim kelsa, u o‘z ishini muvaffaqiyatli bajarish uchun kerakli yo‘riqnomalarni bemalol topa oladi. Bundan tashqari, “UzAuto Motors Powertrain” xorijiy korporativ madaniyat elementlariga ega. Masalan, ofisda “open space communication” formati qo‘llaniladi – bu ofis xodimlari uchun ochiq yaxlit ishchi muhit bo‘lib, uning o‘ziga xos jihati alohida xonalarning mavjud emasligida ko‘rinadi. Bunday format samarali ishlashga va hamkasblar o‘rtasida qulay o‘zaro munosabatlar o‘rnatilishiga xizmat qiladi.

Qolaversa, “UzAuto Motors Powertrain”ning muhim jihati personalni rivojlantirishning samarali dasturi sanaladi, bunda xodim Kompaniyaning istalgan sohasida rivojlanish uchun barcha kerakli bilim va ko‘nikmalarni o‘zlashtira oladi. Chunonchi, misol uchun, kadrlar xizmati departamenti muntazam asosda turli mavzularda o‘quv-treninglar o‘tkazadi.

Karerani endi boshlayotgan yangi xodimlarga qanday maslahat bergan bo‘lardingiz?

Yosh avlodga men o‘zi uchun yangi ishga kirishishda dadil bo‘lishni maslahat berardim. Asosiysi – maqsad qo‘yish va unga erishish uchun qadamlarni belgilash va, albatta, sabr, mehnatsevarlik va o‘z ustida ishlab mustaqil rivojlanishni unutmaslik.

Kompaniyadagi eng katta yutug‘ingiz nimada deb hisoblaysiz?

Asosiy yutug‘im yaxshi o‘qitilgan personal va jamoaning ishi to‘g‘ri yo‘lga qo‘yilganida deb bilaman. Agar xodimlar rivojlanish istagini bildirsalar, men mamnuniyat bilan o‘z texnik bilimlarimni o‘rtoqlashishga tayyorman, zero bu jamoaning motivatsiyasini oshiradi, ularni texnik jihatdan rivojlantiradi va, bunga javoban, kompaniya ajoyib natijalarga erishadi.

Boshqa muhim jihat – bu xodimlarga nisbatan adolatli munosabat, men kommunikatsiya barcha uchun shaffof bo‘lishi kerak deb hisoblayman, xodimlar o‘z hissalari va ishga munosabatlariga muvofiq rag‘batlantirilishi lozim.

Jamoangizda ko‘p narsa insonlarga bog‘liq – ular kompaniyaning eng muhim aktividir. Kompaniyaning barcha yutuqlari bevosita yaxshi o‘qigan va motivatsiyalangan personalga bog‘liq.

Muvaffaqiyatning siri nimada?

Muvaffaqiyatimning siri – tirishqoqlikda va mehnatsevarlikda. Ammo eng muhimi – bu o‘z kasbiga muhabbatdir. Murakkab vazifaga duch kelib, qo‘rquvni his qilganda men doim o‘zimga aytaman: «ko‘z qo‘rqoq, qo‘l botir». Hatto nimaningdir uddasidan chiqa olmasam ham, muvaffaqiyatsizlikka o‘z maqsadimga erishish yo‘lidagi ajoyib saboq sifatida qarayman.

Telegram / Facebook / Instagram

www.uzavtosanoat.uz