“O‘zavtosanoat” AJ tizim korxonalari HR rahbarlari...
“O‘zavtosanoat” AJ Xodimlar bilan ishlash boshqarmasi tashabbusi bilan jamiyat tizim korxonalari HR rahbarlari uchun tashkil etilgan “Birdamlik. Rag‘bat. Liderlik: Bu — jamoamizning formulasi!” shiori ostidagi “UzAuto HR-Brend 2025” forumi muvaffaqiyatli yakunlandi.
Bu yilgi uch kunlik forum dasturi korporativ madaniyatni rivojlantirish va jamoaviy muhitni mustahkamlashga, xodimlarning ish samaradorligini oshirishga alohida e’tibor qaratilishi, shuningdek, jamiyat tizimida HR sohasining strategik ahamiyatini yanada chuqurroq anglashga yo‘naltirilgani bilan mazmunli va samarali o‘tdi.
Xususan, tadbirning birinchi kuni Muqimiy teatriga tashrif bilan boshlandi. Bu ishtirokchilarda madaniy tafakkurni kengaytirish va jamoadagi samimiylik muhitini kuchaytirishga xizmat qildi.
Davlatimizning avtomobilsozlik sohasidagi eng yirik hamkorlaridan biri — Qozog‘iston Respublikasidagi Allur kompaniyasidan vakil sifatida Yermaganbetova Maxabat Imanovna inson resurslari (HR) yo‘nalishi bo‘yicha mutaxassis sifatida taklif etildi.
Mazkur tashabbus ikki mamlakat o‘rtasidagi sanoat hamkorligini mustahkamlash, kadrlar salohiyatini rivojlantirish va korporativ boshqaruvning zamonaviy usullarini amaliyotga joriy etish maqsadida amalga oshirildi. HR mutaxassisining tashrifi davomida tajriba almashish, kadrlar siyosatidagi innovatsion yondashuvlar, xodimlarni rag‘batlantirish va malaka oshirish masalalari muhokama qilindi.
Bu hamkorlik milliy kadrlar bazasini mustahkamlash hamda ishlab chiqarish jarayonlarida inson kapitali samaradorligini oshirishga xizmat qiladi. Shuningdek, ikki tomonlama aloqalarni yanada chuqurlashtirishga yo‘naltirilgan muhim qadam sifatida baholandi.
