O‘zbekiston Respublikasi Prezidentining 2026-yil 20-apreldagi PQ-148-sonli “Yangi O‘zbekiston yoshlari – 2030” strategiyasini 2026–2027-yillarda amalga oshirish hamda yoshlar bandligini ta’minlash bo‘yicha qo‘shimcha chora-tadbirlar to‘g‘risidagi qarori ijrosini ta’minlash maqsadida “O‘zavtosanoat” AJda “Yilning eng faol yosh xodimi” ko‘rik-tanlovi tashkil etildi.
Tanlov yoshlarning kasbiy salohiyatini rivojlantirish, ularning tashabbuskorligi, liderlik qobiliyati hamda innovatsion g‘oyalarini qo‘llab-quvvatlashga qaratildi.
Unda tizim korxonalarida faoliyat yuritayotgan iqtidorli va faol yosh xodimlar ishtirok etib, o‘z bilim va ko‘nikmalari, ijodiy yondashuvi hamda jamoada ishlash salohiyatini namoyon etdilar. Ishtirokchilar beshta shart bo‘yicha o‘zaro bellashib, ularning chiqishlari hakamlar hay’ati tomonidan baholandi.
Tanlov yakunlariga ko‘ra “UzAuto Motors” AJ Xorazm viloyati filiali Sifat bo‘limi boshlig‘i Samandarov Bunyodbek 1-o‘rinni, “UzAuto Motors” AJ Ishlab chiqarish boshqarmasi yig‘uv sexi yig‘uv mexanika va yig‘uv ishlari chilangari Sattarov Islombek 2-o‘rinni, “UzAuto Motors Powertrain” AJ Logistika departamentining Yuk tashish va tayyor mahsulotni yetkazib berishni boshqarish bo‘limi mutaxassisi Uzakaliyev Davron esa 3-o‘rinni egalladi.
Tadbir yakunida g‘olib va ishtirokchilar munosib taqdirlanib, ularga kelgusidagi faoliyatida muvaffaqiyatlar tilandi.
“Yilning eng faol yosh xodimi” ko‘rik-tanlovi tizim korxonalarida faoliyat yuritayotgan yosh mutaxassislarning bilim va salohiyatini namoyon etish, ularni yangi yutuqlar sari ruhlantirish hamda istiqbolli kadrlar zaxirasini shakllantirishga xizmat qiluvchi muhim platformalardan biri hisoblanadi.
- 23/06/2026
- Bo'lim: “O‘zavtosanoat” AJda yoshlar siyosati