“Oʻzavtosanoat” AJ va uning tarkibiga kiruvchi tizim korxonalariga yosh, iqtidorli hamda yuqori bilim va koʻnikmaga ega kadrlarni jalb qilish tizimi samarali yo'lga qo'yilgan. Oliy taʼlim muassasalari va u yerda tahsil oluvchi talabalar bilan doimiy hamkorlikni yo'lga qo'yish maqsadida kompaniya Xodimlar bilan ishlash boshqarmasi hamda Toshkent shahridagi Xalqaro “Westminster” universitetining Karerani rivojlantirish markazi va bitiruvchilar bilan aloqalar boʻlimi o‘rtasida uchrashuv tashkil etildi.

Muloqot davomida o'zaro hamkorlikning yo‘lga qo‘yilishi har ikki tomon uchun ham manfaatli bo‘lishi ta’kidlandi. Yosh mutaxassislarning sohaga doir tashabbuslarini qo‘llab-quvvatlash maqsadida mazkur universitet talabalari uchun Kompaniya xodimlari tomonidan ochiq kurslar tashkil etilish bo'yicha fikr hamda takliflar ham o'rtaga tashlandi.

Endilikda, “Oʻzavtosanoat” hamda “Westminster” universiteti hamkorligida avtomobilsozlik sohasini rivojlantirishga qaratilgan o‘quv-seminarlar hamda magistratura kurslari tashkil etiladi.

Shuningdek, mazkur Oliy ta'lim muassasasi xodimlari hamda talabalari uchun ishlab chiqarish korxonalariga ekskursiyalarni tashkil etishga kelishib olindi. Ikki tomonlama hamkorlik bo'yicha o'tgan muzokaralar juda muvaffaqiyatli yakunlandi.

Uchrashuv yakunida muhokama qilingan mavzular dolzarbligi va ikki tarafga ham hamkorlik o‘rnatishda katta qiziqish mavjudligi sababli “Kadrlar zaxirasini yaratish” dasturi doirasida universitet bitiruvchi talabalarini kasbga yo‘naltirish, yoshlar bandligini ta’minlash bo‘yicha hamkorlik aloqalarini o‘rnatishga kelishib olindi.