“Qishki maktab” ochilish marosimi doirasida matbuo...
Toshkent shahridagi Toshkent shahridagi Turin politexnika universitetida Janubiy Koreyaning Korea National University of Transportation (KNUT) hamda Ta’limni rivojlantirish respublika ilmiy-metodik markazi hamkorligida tashkil etilgan “Qishki maktab” ochilish marosimi doirasida matbuot anjumani o‘tkazildi.
Tadbirda ta’kidlanganidek, O‘zbekiston Respublikasi Prezidenti Shavkat Mirziyoyevning 2023-yil 20-apreldagi PQ-128-son qarorida ta’lim sohasini rivojlantirishga qaratilgan tahliliy va amaliy tadqiqotlar olib borish, ta’lim jarayoniga jahon ilm-fani hamda zamonaviy texnologiyalar yutuqlarini keng joriy etish bo‘yicha muhim vazifalar belgilangan.
Mazkur qaror ijrosini ta’minlash maqsadida Janubiy Koreyaning Korea National University of Transportation universiteti bilan hamkorlikda Koreya ta’lim vazirligi granti asosida maktablarning yuqori sinflarida 2026–2030-yillarda informatika va axborot texnologiyalari fani doirasida sun’iy intellekt hamda robototexnika asoslarini o‘qitishni takomillashtirishga qaratilgan ODA grant loyihasini amalga oshirish rejalashtirilgan.
Loyiha doirasida Toshkent shahridagi Turin politexnika universitetida koreyalik mutaxassislar ishtirokida sun’iy intellekt va robototexnika asoslarini o‘rgatishga qaratilgan “Qishki maktab” tashkil etildi. Joriy yilning 6–10-yanvar kunlari davom etadigan o‘quv mashg‘ulotlarida Toshkent shahrining 12 ta tumanidagi maktablarning 10–11-sinflaridan 24 nafar o‘quvchi hamda “Informatika va axborot texnologiyalari” fanidan 12 nafar o‘qituvchi ishtirok etishi belgilangan.
Matbuot anjumanida qayd etilganidek, mazkur loyiha o‘quvchilarning STEM fanlariga qiziqishini oshirish, ularni kelgusida muhandislik yo‘nalishlarida oliy ta’lim olishga rag‘batlantirishga xizmat qiladi.
Tadbirda Toshkent shahridagi Turin politexnika universiteti rektori Olimjon To‘ychiyev mazkur loyiha xalqaro hamkorlikni rivojlantirish bilan birga, yoshlarning zamonaviy texnologiyalar sohasidagi bilim va ko‘nikmalarini oshirishda muhim ahamiyat kasb etishini ta’kidladi.
Shuningdek, Korea National University of Transportation professori o‘z nutqida bugungi kunda sun’iy intellekt va robototexnika texnologiyalari jadal rivojlanib borayotganini qayd etib, yoshlarni ushbu yo‘nalishlarga jalb etish kelajak uchun muhim sarmoya ekanini alohida ta’kidladi.
Trening ochilish marosimi doirasida Koreya milliy transport universiteti professor-o‘qituvchilari tomonidan o‘quvchilarga 21-asrda ishlab chiqarish jarayonlarini avtomatlashtirishga oid master-klass ham o‘tkazildi. Unda robototexnika va sun’iy intellekt yo‘nalishlarida bilim olishning ahamiyati haqida batafsil ma’lumot berildi.
Trening jarayonlarini yanada samarali tashkil etish maqsadida koreyalik hamkorlar tomonidan robototexnika laboratoriyasining moddiy-texnik bazasini shakllantirish uchun Arduino to‘plamlari hamda PIBO robotlari olib kelindi. Ushbu jihozlar orqali o‘quvchilar nazariy bilimlarini amaliyotda sinab ko‘rish imkoniyatiga ega bo‘ladilar.
Ta’kidlanishicha, tajriba-sinov sifatida amalga oshirilayotgan mazkur loyiha natijasida to‘plangan ijobiy tajribalarni kelgusida mobil laboratoriyalar yordamida respublikamizning chekka hududlaridagi maktablarda ham joriy etish rejalashtirilgan.
