Ijtimoiy tarmoqlarda 89 km yurgan Chevrolet Cobalt avtomobili nosoz dvigatel bilan egasiga topshirilgani haqida ma’lumot tarqalmoqda.
Mazkur holat yuzasidan UzAuto Motors Powertrain mutaxassislari ishtirokida texnik ekspertiza o‘tkazildi.
Tekshiruv natijalariga ko‘ra, avtomobil dvigateli zavodda nazarda tutilgan barcha sinovlardan muvaffaqiyatli o‘tgani, shuningdek, uni ishlab chiqarish jarayonida ishlab chiqarish nuqsoni yoki texnologik jarayon buzilishi holatlari aniqlanmagani ma’lum bo‘ldi.
O‘rganish davomida avtomobil 2023-yil noyabr oyida xarid qilingani, shundan so‘ng ikki yarim yildan ortiq muddat davomida foydalanilmagani hamda belgilangan reglament asosida texnik xizmat ko‘rsatilmagani aniqlandi. Mutaxassislar xulosasiga ko‘ra, aynan shu holat dvigatel keyingi ishga tushirilganida nosozlik yuzaga kelishiga sabab bo‘lgan.
Shunday qilib, o‘tkazilgan texnik ekspertiza natijalari avtomobil nosoz dvigatel bilan egasiga topshirilgani haqidagi ma’lumotni tasdiqlamaydi. Yuzaga kelgan shikastlanishga ishlab chiqarish nuqsoni emas, balki avtomobilni saqlash qoidalariga rioya qilinmagani va o‘z vaqtida texnik xizmat ko‘rsatilmagani sabab bo‘lgan.
Eslatib o‘tamiz, "O‘zavtosanoat" AJ barcha kelib tushayotgan murojaatlarga alohida e’tibor qaratadi hamda amaldagi qonunchilik doirasida faoliyat yuritadi.
