UzAuto jamoasidan eng yaxshi tilaklar bilan

G‘anijon Kamalov Volgograd politexnika instituti muhandis-konstruktor fakultetining bitiruvchisi. UzAuto korxonalaridagi 25 yillik faoliyati davomida turli lavozimlarda xizmat qilib, ko‘plab shogirdlar chiqargan.

G‘anijon aka sanoat sohasida qo‘shgan bebaho hissasini Asakaning Toshkent traktor zavodi filialidan boshlagan. 1994 yilda ushbu zavod o‘rnida UzDaewoo Auto Uzbekistan-Korea qo‘shma korxonasi qurilishi boshlangan.

1995 yildan Asakadagi «UzAuto Motors» zavodida turli lavozimlarda ishlab, ko‘p yillar davomida muxandislik boshqarmasini boshqargan. G‘anijon Kamalov «UzAuto Motors» korxonasida ishlab chiqarilgan ko‘plab yangi modellarni o‘zlashtirishda katta xissa qo‘shgan.

2011-yildan boshlab G‘.Kamalov Uz Truck & Bus Motors zavodining sertifikatlashtirish va standartlashtirish bo‘limida ishlagan. Shu kunga qadar korxona rivoji uchun o‘z bilimi va keng salohiyatini tadbiq qilgan holda korxonadagi yosh kadrlarga bilim va malakasini o‘rgatgan.

O‘zining mehnat faoliyati davomida “O‘zstandart” agentligi bilan hamkorlikda yangi ishlab chiqarilayotgan yuk tashuvchi transport vositalarining standartlarga muvofiqligini ta’minlab kelgan. Bundan tashqari, u korxonada ishlab chiqarilayotgan mahsulotlarni Rossiya va Qozog‘iston respublikasi bozorlariga eksport qilish uchun ushbu davlatlarning talablaridan kelib chiqqan holda sertifikatlashtirishda o‘zining salmoqli hissasini qo‘shgan.

Har bir ishga mas’uliyat bilan yondashishi, murakkab muammolarni hal qilish qobiliyati unga ishlab chiqarish samaradorligida yuqori ko‘rsatkichlarga erishish imkonini berdi.

Mana bugun G‘anijon Kamalov Uz Truck & Bus Motors standartlashtirish va sertifikatlash bo‘limi boshlig‘i lavozimidan nafaqaga chiqmoqdalar.

G‘anijon G'ulomovich, Siz biz uchun hamisha qadrli xodim bo‘lgansiz. Soha rivojiga qo‘shgan hissangiz, ko‘p yillik mehnat faoliyatingiz va fidoyiligingiz uchun tashakkur! Kelgusidagi ishlaringizda omad, sihat-salomatlik va farovonlik tilaymiz!

Eng yaxshi tilaklar bilan,
UzAuto jamoasi