“CLAAS Central ACADEMY”si CLAAS nemis texnologiyasi bo‘yicha seminar o‘tkazdi

Tadbirda yuqori sifatli CLAAS texnikalariga qiziquvchi talabalar, mexanizatorlar, fermer va tadbirkorlar ishtirok etishdi. TIIAME rektori, professor Bahodir Mirzayev o‘zining tabrik so‘zida zamonaviy qishloq xo‘jaligida mexanizatsiyalashning ahamiyati va O‘zbekistonda fermer xo‘jaliklarini davlat tomonidan qo‘llab-quvvatlash dasturi to’g’risida to’xtaldi. “Uz CLAAS Agro” MCHJ vakillari foydalanuvchilar uchun taqdimotli o‘quv mashg‘ulotlarini o‘tkazishdi. 

CLAAS Central ACADEMY vakili Sergey Butov bugungi kunda qishloq xo‘jaligi texnikasini ishlab chiqarish bo‘yicha Yevropada yetakchilardan biri bo‘lgan Germaniyaning CLAAS kompaniyasining tarixi va faoliyati borasida qisqacha to’xtalib seminarni boshladi. Ishtirokchilar O’zbekistonda taqdim etilgan CLAAS g‘alla o‘rish kombaynlari va traktorlarining xususiyatlari hamda texnik tavsiflari bilan tanishishdi. Butov xulosa qilib, qishloq xo‘jaligini raqamlashtirish haqida gapirib berdi.

CLAAS konserni 1913-yilda tashkil etilgan oilaviy kompaniyadir. U bugungi kunda qishloq xoʻjaligi texnikasini ishlab chiqarishda jahon yetakchilaridan biri hisoblanadi. Bosh ofisi Germaniyaning Hazervinkel shahrida joylashgan.

Kompaniya kombaynlar bozori bo'yicha Yevropada yetakchi va yem-xashak yig‘ish mashinalari bo‘yicha jahon yetakchisi hisoblanadi. CLAAS traktorlari, qishloq xoʻjaligi presslari va yem-xashaklarni yigʻish mashinalari ham jahon qishloq xoʻjaligi texnologiyasida yetakchi o’rinlarni egallaydi. Mahsulotlar qatoriga raqamli yechimlar va qishloq xo'jaligi uchun eng yangi axborot texnologiyalari ham kiradi.

Kompaniya 2010-yildan buyon O‘zbekistonda DOMINATOR-130 rusumli g‘alla o‘rish kombaynlari, AXOS 340C va ARION 630C traktorlari, MARKANT 55 presslash mashinalarini ishlab chiqarishni yo‘lga qo‘ygan.

• event 24/06/2022
• local_offer Bo'lim: Yangiliklar
• thumb_up Yoqdi (0)
• thumb_down Yoqmadi (0)