Toshkentda Volkswagen avtomobillarining yangi mode...
Toshkent City majmuasida Volkswagen va Jetta brendlarining O‘zbekiston bozoriga mo‘ljallangan yangi avtomobillari taqdimoti bo‘lib o‘tdi.
Tadbir avvalida “O‘zavtosanoat” AJ Boshqaruvi raisi o‘rinbosari Davron Xidoyatov, “Alyans Auto” MChJ bosh direktori Oybek Ayubov, SAIC Volkswagen kompaniyasi ijrochi vitse-prezidenti Holger B. Santel hamda FAW-Volkswagen tarkibidagi Jetta Automotive kompaniyasi prezidenti Dirk Mayer so‘zga chiqib, O‘zbekiston avtomobil bozorining rivojlanish istiqbollari, xalqaro hamkorlikni kengaytirish va Volkswagen brendining mamlakatimizdagi faoliyatini rivojlantirish masalalariga to‘xtalib o‘tdilar.
Taqdimot davomida Volkswagen Lavida XR, Tharu XR, Passat Pro, Tiguan L Pro, Teramont X va Teramont Pro, shuningdek Jetta VS5 hamda Jetta VS7 modellari namoyish etildi. Tadbir ishtirokchilari avtomobillarning texnik imkoniyatlari, dizayn yechimlari, xavfsizlik tizimlari va qulaylik darajasi bilan yaqindan tanishish imkoniyatiga ega bo‘ldilar.
Mazkur loyiha Volkswagen AG va “Alyans Auto” o‘rtasidagi hamkorlikning amaliy bosqichga o‘tayotganini ifodalaydi. Shu bilan birga, loyiha doirasida mamlakatimizda savdo, servis va sotuvdan keyingi xizmatlar infratuzilmasini rivojlantirish bo‘yicha ham izchil ishlar olib borilmoqda.
Tadbir doirasida Volkswagen va Jetta brendlarining O‘zbekiston bozorida taklif etiladigan modellari hamda kompaniyaning kelgusidagi rivojlanish rejalari haqida ma’lumot berildi.
