Toshkentdagi Turin politexnika universitetini tamomlayotgan o’ninchi bitiruvchilarga diplomlar topshirildi

Toshkentdagi Turin Politexnika universitetida bitiruvchilarga tantanali diplom topshirish marosimi bo‘lib o‘tdi. Joriy bitiruv yili mazkur universitet uchun yubileyga aylandi – boisi, 2009 yildan buyon 1267 nafar yosh mutaxassis 10 ta potokda ushbu Oliy ta’lim muassasasini tamomlagan.

Tantanali marosimda «Mashinasozlik texnologiyasi», «Аxborot texnologiyalari», «Sanoatda axborot texnologiyalari va avtomatlashtirilgan boshqaruv tizimlari», «Sanoatda xoʼjalik qurilishi va arxitektura», «Аvtomobilsozlik muhandisligi» kabi yo‘nalishlarini tamomlagan 200 nafardan ziyod bitiruvchilarga diplomlar topshirildi.

Bitiruvchilarni tabriklash hamda diplomlarni topshirish maqsadida tadbirda Italiyaning O‘zbekistondagi Favqulodda va muxtor elchisi Agostino Pinna, Turin politexnika universiteti rektori (Italiya) Guido Sarakko va Toshkentdagi Turin politexnika universiteti rektori Jamshid Inoyatxodjayevlar ishtirok etishdi.

Shuni ta'kidlash joiz, Toshkentdagi Turin Politexnika universiteti talabalarining bugungi kunda talab yuqori bo’lgan mutaxassisliklar hamda yuqori sifatli ta'lim asosida o’qitilishi, ularni kelgusida yirik korxonalar uchun eng malakali kadrlarga aylantiradi – bu esa, Toshkentdagi Turin Politexnika universiteti bitiruvchilarining 100 %i o'qishni tamomlagandan so'ng darhol ishga joylashishlariga zamin hozirlaydi. Mazkur universitetda tahsil olgan yoshlar bugungi kunda avtomobilsozlik, energetika, metallurgiya, elektrotexnika va boshqa yuqori intellektual hamda innovatsion yo’nalishlarda o’z karyeralarini yuritmoqdalar.