"Yangi O‘zbekiston" universiteti talabalari "BYD Uzbekistan Factory" zavodi bilan tanishdilar

O‘zbekiston Respublikasi Prezidentining "Ichki turizm xizmatlarini diversifikatsiya qilishga oid chora-tadbirlar to‘g‘risidagi" qaroriga asosan "Yangi O‘zbekiston" universiteti talabalarining Jizzax viloyatiga tashkillashtirilgan sayohati doirasida, 25-fevral kuni 50 nafarga yaqin talaba "BYD Uzbekistan Factory" MChJga tashrif buyurdi.

Dastlab talabalarga zavod rahbariyati tomonidan korxona bosh plani bo‘yicha uning texnologik imkoniyatlari, xususan, ishlab chiqarish jarayonlari va quvvatlari, asosiy yo‘nalishlari va kelajakdagi rivojlanish rejalari haqida batafsil ma'lumotlar berildi.

Talabalar zavod faoliyati bilan tanishish chog‘ida payvandlash, bo‘yoqlash va yig‘uv sexlarida o‘rnatilgan avtomatik tizimlar va yuqori aniqlikdagi uskunalar yordamida materiallarning sifatli va mustahkam birlashtirilish jarayonlarini, shuningdek, elektromobillar va gibrid avtomobillarning tayyor holga kelguncha bo‘lgan barcha ishlab chiqarish bosqichlarini yaqindan ko‘rish imkoniyatiga ega bo‘ldilar. Ayniqsa, yuqori aniqlikda ishlovchi zamonaviy texnologiyalar, avtomobillarni ishlab chiqarish jarayonidagi avtomatlashtirish va robot texnologiyalari talabalarda katta qiziqish uyg‘otdi.

— Men muxandislik yo‘nalishi talabasiman va o‘z soham bo‘yicha birinchi sayohatim ushbu zavodga amalga oshirilganidan juda hursand bo‘ldim. Elektromobil va gibrid avtomobillar ishlab chiqaruvchi zavoddagi texnologiyalar menda katta taassurot uyg‘otdi. Bu yerdagi ishlab chiqarish jarayonlarini ko‘rib, o‘qishga bo‘lgan ishtiyoqim yanada ortdi va kelajakda yuqori malakali mutaxassis bo‘lib yetishib, mazkur korxonada faoliyat yuritishni maqsad qilib qo‘ydim, — deydi "Yangi O‘zbekiston" universiteti talabasi Bexruz Do‘stmurodov.

Ta'kidlash joiz, talabalarning milliylikni ifodalovchi liboslarda tashrif buyurishlari zavodda milliylik nafasini olib kirdi.

— "BYD Uzbekistan Factory" zavodiga tashrifimiz kutilgandan ham ancha yuqori darajada o‘tdi. Buning uchun universitetimiz hamda "O‘zavtosanoat" rahbariyatiga chuqur minnatdorchilik bildiraman. E'tiborimni eng ko‘p tortgan jihat esa ishlab chiqarish jarayonining robotlar yordamida amalga oshirilayotgani bo‘ldi. Kuni kecha davlatimiz rahbari iqtidorli yoshlar bilan uchrashuv chog‘ida bizga bildirgan ishonch va yaratilayotgan sharoitlar hamda imkoniyatlardan ilhomlanib, bugun milliy kiyimda keldik. Men kiberxavfsizlik yo‘nalishida tahsil olayotganim sababli, ta'til davrida bu yerda malaka oshirish imkoniyatining mavjudligi meni juda quvontirdi, — deydi "Yangi O‘zbekiston" universiteti talabasi Sevinch Anvarova.

Zavod bo‘ylab sayohat yakunida talabalar mazkur zavodda malaka oshirish hamda kelgusi faoliyatlarini shu yerda davom ettirish taklifini bildirdilar. "O‘zavtosanoat" AJ vakillari mazkur tashabbus zavodning kelajakda yuqori malakali mutaxassislar bilan ta'minlanishiga hissa qo‘shishini alohida ta'kidladilar. Universitet va zavod vakillari talabalarning bu yerda malaka oshirishlarini yo‘lga qo‘yish bo‘yicha hamkorlik qilishga kelishib oldilar.

Shuningdek, talabalar ishlab chiqarish jarayoni bilan bog‘liq o‘zlarini qiziqtirgan savollarga zavod rahbariyati tomonidan javob olishdi. Mehmonlar yig‘uv sexining final liniyasida esdalik uchun rasmga tushdilar.

• event 26/02/2025
• local_offer Bo'lim: Yangiliklar
• thumb_up Yoqdi (0)
• thumb_down Yoqmadi (0)