Davlat rahbari tashabbusi asosida “O‘zavtosanoat” AJ, O‘zbekiston Respublikasi Bosh prokuraturasi, “Agrobank” ATB va “Toshkent traktor zavodi” MChJ hamkorligida “Uzagrostar xolding” kompaniyasi tasarrufidagi tadbirkorlar bilan uchrashuv tashkil etildi.
Tadbir doirasida tashkil etilgan ko‘rgazmada bog‘dorchilik, tomorqachilik, paxtachilik va g‘allachilik uchun mo‘ljallangan zamonaviy traktorlar, paxta terish kombaynlari, seyalkalar hamda boshqa ilg‘or texnikalar namoyish qilindi.
Ochiq muloqot ruhida o‘tgan uchrashuvda sohada mavjud ehtiyojlar, texnikalar xaridini moliyalashtirishning qulay mexanizmlari, lizing va bank xizmatlarini kengaytirish hamda servis markazlari faoliyatini rivojlantirish masalalari atroflicha muhokama qilindi.
Tashrif davomida mehmonlar “Toshkent traktor zavodi”ning ishlab chiqarish maydonlarida bo‘lib, mahalliylashtirilayotgan mahsulotlar, ilg‘or texnologiyalar va yurtimiz muhandislari mehnati natijasida yaratilayotgan texnikalarni kuzatdilar.
Shuningdek, tadbirkorlar zavodda ishlab chiqarilayotgan zamonaviy texnikalarni xarid qilish yuzasidan qator shartnomalar imzolashga erishib, kelgusidagi hamkorlik uchun mustahkam zamin yaratdilar.
- 04/06/2026
- Bo'lim: Yangiliklar